Na Corsou a sentencia homber Arubiano gara cu 1 kilo y mei di marihuana geplak na barica

WILLEMSTAD. – E akusado  V.V. (33) nasé na Aruba  su kaso a keda tratá den su ousensia. Segun akusashon dia 21 di febrüari último, el a trata na eksportá 1.535 gram di mariwana.

E tabatin e paketenan di plak na su pianan i tambe na su barika. Na su manera di kana e tim di duana a ripará ku e hòmber tabata kanando di un forma straño. Esei tabata motibu ku nan a hasi un kontròl mas severo riba dje.

Ora ku esaki a sosodé, e personal di duana a deskubrí e paketenan bou di su bòkser i tambe  na su pianan. El a atmití mesora ku e tabata transportando droga. Segun e akusado, el a hasi esaki pa su propio uso i tambe pa e bende.  Banda di esaki el a deklará na polis ku e ta transportá droga regularmente, pero pa Estádos Unídos.

Fiskal a bisa ku e ta lamentá ku e  hòmber no tei pa e por puntr’é di su situashon personal.

Fiskal a yega na un demanda di 12 luna di kual 6 kondishonal. Wes den su desishon a bisa ku e no ta mira motibu pa desviá i ta bai kompletamente di akuerdo ku e demanda di fiskal. NOTA: Texto scirbi den Papiamento fonetico di Corsou.