Carlos Bislip cu concierto gratis di JAM riba Dia Mundial di Jazz

Posted on 04/15/2024 2:25 pm AST | Updated on 04/15/2024 2:26 pm AST

ORANJESTAD  – Manera a bira conoci caba, sigur anto pa tur amante di e genero musical aki, luna di april ta celebra mundialmente e aprecio pa jazz. Un di su promotor y exponentenan di mas grandi riba nos isla, esta e maestro di percusion Carlos Bislip a sa di prepara, un biaha mas, un merecido celebracion. 

E cita pa disfruta di un anochi di bon musica ta diamars 30 di april proximo na Kulture Café na San Nicolas, cuminsando di 7’or di anochi. Entrada ta gratis cu un varios agrupacion local e internacional interpretando un repertorio amplio pa deleita bo bou di nos shelo y e streanan. 

Jazz Appreciation Month of JAM ta un iniciativa di e instituto Smithsonian na Washington, DC cu posteriormente, na november 2011 e United Nations Educational, Scientific and Cultural Organization (UNESCO) oficialmente a dedica 30 di april como e Dia Internacional di Jazz cargando e obhetivo original, esta di resalta e musica cu ta uni mundo mas cu cualkier otro genero.

Na Aruba ta celebrando JAM desde 2006, danki na Carlos Bislip. E prome concierto tabata den Cas di Cultura, pero den ocasion tambe tabata na Biblioteca Nacional. E aña aki, cu ta bira e di diesnuebe edicion, pa di dos biaha consecutivo ta hacie na San Nicolas. E decision aki ta danki na e reaccion positivo di e publico.

Rapidamente Bislip a ripara cu JAM tabata un plataforma excelente pa fomenta nos talento local. Di e manera ey, el a combina e studiantenan di scol di musica cu musiconan local, brindando e hobennan un experiencia hopi util. E resultado ta excelente ya te cu aworaki, 20 di esunnan cu a participa den JAM a scoge pa sigui estudio di musica den exterior.

E aña’ki no ta diferencia y ta conta con alrededor di 20 hoben musico cu ta forma e asina yama Caribbean Combo, bou direccion di Carlos Bislip cu lo toca poco tema cu influencia di funky, reggae y mambo. Loke si ta nobo, ta e introduccion di vocalistanan. Osdelis Wester, Tabitha Heemstad y Pearl Dumfries ta compaña pa un cuartet pa presenta version di tema local. 

Di su banda, e pianista Timothy Nadal, kende ta un hoben hopi prometedor, segun Bislip. Tambe ta forma parti di e concierto cu temanan tipo fusion. Ta sigui e ora ey Richard Holman, drummer di gran trayectoria cu un combinacion di jazz y tema di artista di nos region. Holman ta un musico, kende despues di varios aña purbando, a logra sincronisa schedule ya cu e tin hopi presentacion. Siguientemente lo presenta Carlos Bislip Tipico Jazz, nomber cu el a duna na e combinacion di amigonan musico, ya cu ta bay enfoca riba e folklore Arubano, ademas di algun propio composicion. 

Pa clausura di e anochi ta conta cu artista di exterior. Na prome luga tin Freddy Franken, kende ta un Aruiano residencia na Merca. Franken ta profesor di guitara na un universidad di Chicago. Su tras lo haya e musica Mericano Chase Beard, kende tin un trayectoria largo, pero actualmente ta bibando na Aruba.

Carlos Bislip ta invita tur fanatico di Jazz pa no perde e oportunidad aki pa bin na Kulture Cafe na San Nicolas. E concierto ta cuminsa pa 7’or di anochi, pero ya for di 6’or di atardi publico por cuminsa yega y tuma nan luga den e espacio pafo dilanti stage. Ta recomenda pa trece bo mesun stoel y mesa ya cu e cantidad limita di mesa ya ta completamente reserva.

E concierto gratis pa publico como parti di JAM ta posibel danki na e colaboracion valioso di entidadnan local manera Aruba Tourism Authority Sui Generis, Aruba Airport Authority N.V., Departamento di Cultura Aruba, UNOCA, Prins Bernhard Cultuurfonds, Kulture Café, Setar N.V., Jack Daniels y Vibration PR.

Pa mas informacion tocante e concierto gratis JAM, por bishita e pagina di Carlos Bislip, Vibration PR of Kulture Cafe riba Facebook.

  • Kiwanis Club of Palm Beach a instala miembronan nobo!

    Kiwanis Club of Palm Beach a instala miembronan nobo!

    PALM BEACH  – Recientemente Kiwanis Club of Palm Beach a organiza un evento special, durante cual a instala dos (2) miembro nobo. E evento aki a tuma lugar na La Cabana Beach Resort & Casino, cu a percura pa un cena masha dushi mes, cual e miembronan a disfruta hopi mes.

  • Soul Beach Music Festival a domina e fin di siman di Aruba

    Soul Beach Music Festival a domina e fin di siman di Aruba

    ORANJESTAD – E fin di siman aki Aruba a goza di e di 22 Soul Beach Music Festival, cu artistanan manera Skip Marley y Boyz 2 Men. Un grupo grandi di turista, gran parti di color, a yega Aruba na cantidadnan grandi y a disfruta di e actividadnan cu a cuminsa pa hopi, for di diaranson siman pasa y ta culmina dialuna. E highlight obviamente tabata e conciertonan di diasabra y diadomingo, y e anochi di comedia diabierna anochi. Comediantenan manera Chase Anthony y Earthquake y artistanan manera Skip Marley y Boyz 2 Men tabata esnan encarga cu entretenimiento diasabra y diadomingo. Mariah Carey y Tamika tambe no a dececpciona. Bandanan local manera N'Fuzion y Buleria tambe no a falta e fin di siman aki. 

  • Grupo di Betico ta lansa produccion internacional incluyendo e tema ‘Locura’

    Grupo di Betico ta lansa produccion internacional incluyendo e tema ‘Locura’

    ORANJESTAD - Grupo di Betico a lansa produccion internacional ‘Locura’. “Amistad, Felicidad y Alegria t’e sinomino di Grupo di Betico pa 55 aña, esaki ta parti di e produccion cu peso pa exportacion” e grupo ta bisa riba rednan social. Segun e grupo, a yega e momento pa concretiza un soño y mas ainda honrando di e creador di e sonido cu nos conoce Grupo di Betico esta Hildward Croes [d.f.m.], e maestria di Gos Oduber, e vesatibilidad di Miguel Genser plus cada un integrante cu tey y tur esnan cu a bay ta admirando e obra di arte musical aki for di cielo.

  • Kiwanis Club of Palm Beach a celebra su reunion anual!

    Kiwanis Club of Palm Beach a celebra su reunion anual!

    PALM BEACH -   Recientemente Kiwanis Club of Palm Beach a celebra su reunion anual den un atmosfera den cual e hermandad fuerte den e club a refleha un biaha mas.Tradicionalmente y cumpliendo cu e statutonan di Kiwanis International y di e club mes, e agenda a consisti di un punto: 1) Aprobacion di e team cu a wordo nomina pa conforma e directiva pa e aña Kiwanistico 2024-2025 y cu lo wordo instala na Oktober proximo.

  • Kes the Band di Trinidad confirma pa Flip Flop Festival na juni!

    Kes the Band di Trinidad confirma pa Flip Flop Festival na juni!

    ORANJESTAD – E banda popular di Trinidad Kes the Band ta confirma pa presenta durante e proximo edicion di Flip Flop Festival dia 1 di juni proximo. Durante un conferencia di prensa diahuebs atardi, organisadornan a anuncia esaki, como un di e varios bandanan internacional cu lo ta presente durante e anochi aki. E intencion ta pa dentro di 2 siman presenta demas artistanan internacional tambe. E evento lo tuma lugar riba Bushiri Beach, y lo ta parti den varios seccion. A cuminsa bende carchi caba awe unda cu e prome cantidad di carchi ta bay na 45 florin estilo ‘early bird’ pa tempo limita. Flip Flop Festival ta un producto di cerbez Chill, y Brouwerij Balashi hunto cu Tropical Bottling Company su productonan Coca Cola y Bacardi. Fuera di e artistanan internacional, lo tin artistanan local manera e.o. Tsunami. 

  • Video: Con a yega na titulo di documentario ‘I can’t be moe’ ?

     Video: Con a yega na titulo di documentario  ‘I can’t be moe’ ?

    ORANJESTAD – Diabierna awor tin estreno di e documentario localmente produci titula ‘I can’t be moe’. Un documentario unda cu e productor ta sigui e bida di e conocido personahe local Alice van Romondt durante 2 aña. Pregunta ta, con a yega na e titulo asina ‘captivo’, un combinacion di Ingles y Hulandes y con esaki a yega pa bira e titulo di e documentario. Tanto e productor Rebecca Roos, como e suheto di e documentario, Alice van Romondt a splica esaki den e programa Noticiacla LIVE diamars anochi. E documentario ta pasa diabierna anochi 19 di april pa 8'or di anochi den Cas di Cultura y ta costa 25 florin pa entrada. 

  • Powered by SETAR