Dowers: Asunto RHD no ta pa presion di car dealers of payback campaña

ORANJESTAD – No ta presion di ningun car dealer a pone cu e mandatario di husticia a trece e problema di RHD (Right Hand Drivers) dilanti. Esaki minister Arthur Dowers a sigura NoticiaCla.com. For di momento cu e noticia a sali luna pasa cu kier haci algo cu e problema aki di RHD, e rumor a cuminsa circula cu ta presion di dealernan di auto a pone presion riba e mandatario. Posibel payback di campaña lo ta e motibo. Nada di esey ta e caso, segun e mandatario.

ACUSACION PRET

E mandatario ta considera e acusacion ey hopi pret mes. “Si un hende bisa awo cu mi ta defendiendo interes specifico, bo ta puntra bo mes kico tur hende ta haci. Tur hende ta defende nan interes”. Mas specifico, e mandatario a bisa” Ningun momento un hende por bin serca mi, -pasobra mi ta kere bo conoce mi mas miho cu awe-, hende no por bin serca mi bisami pa cambia ningun areglo, basa riba e hecho cu nan tin un interes specifico”.

KICO A PASA

“Loke cu mi sa … ,-no a haya ningun peticion di ningun hende cu ta sostene campaña-, pa tuma ningun decision” Dowers a ripiti. “Loke mi por bisabo, -y mi a bisa esey 5 aña pasa-, e prome grupo cu a keha riba e autonan aki ta seguro”. Despues e car dealernan enberdad a keha. “Pero mi a te hasta nenga di papia cu e car dealernan pasobra mi a bisa nan .. tende boso tin un interes specifico y mi ta compronde tur e interesnan aki” e mandatario a sigui bisa. E ta papia di e interes pa cu nan benta di auto. Como tal e tempo ey e no a papia cu nan.

MOTIBO REAL

E mandatario a bisa cu ta su combersacion cu tata di un defunto di un accidente fatal a consecuencia di e coremento cu auto di stuur drechi, cu a acerca Dowers, pa haci e cambionan. “E discusion, pa ta hopi cla, cu cua auto y cuanto accidente a pasa, esey no ta discusion. E discusion ta masha fundamental. E ta ora cu a bin cu auto, y a traha auto man drechi of robes, ta basa riba e caminda cu e auto ta core” Dowers a sigui bisa. E ta lamenta cu hende ta haci como si fuera e asunto ta ‘grote flauwekul’. “Si tur ingeniero cu a traha auto di e forma ey, no sa nada, y nos cu ta core auto sa miho, mi ta haya e cos ey hopi straño”. Si no tabatin ningun diferencia riba e aspecto di seguridad, ora ta trata di unda e stuur di e auto ta, lo no a traha auto cu stuur dos banda, e mandatario a sigui bisa.

KICO A PASA

Tabata luna pasa cu e mandatario a informa cu ta sondeando e posibilidad pa para autonan cu stuurwiel man drechi (RHD) pa ta riba caminda na Aruba. E intencion aki a contrae hopi resistencia pero tambe apoyo y comentario di specialmente e grupo di doñonan di auto RHD. A nace RHD Community cu rapidamente a mobilisa pa purba frena e intencion di e mandatario. Un reunion inicial cu e mandatario, a keda na solamente un reunion debi na diferencia di opinion riba e punto aki. Mientrastanto e mandatario ta canando su caminda pa bin cu un solucion pa e asunto aki.