The Travel: Aruba ta e di 5 isla mas sigur den Caribe for di un lista di 7

ORANJESTAD – Mientras cu recientemente gobierno di Aruba a cita un informacion internacional cu Aruba ta e isla mas safe den Caribe, un otro raportahe cu a sali e siman aki riba e portal www.thetravel.com, ta pone Aruba na number 5 di 7 pais den Caribe. E portal ta sigui mustra cu biaheronan por experencia tur e miho partinan di Caribe, desde e islanan ABC te nabega e lamanan pa e resortnan all inclusive y relaha riba islanan aisle y disfruta di e calor di Caribe. Esaki sin sinti menasa pa actividadnan criminal. 

TASA DI CRIMEN

Segun e raportahe di e portal   ta determina e tasa di criminalidad colectando varios fuente, incluyendo cifra oficial di polis y encuesta di victima. Esaki ta wordo cualifica e ora den varios categoria di crimen, permitiendo un analisis comprensivo y patronchi di tal.  

 INTERPRETACION 

 Tambe e portal ta bisa cu ora cu interpreta data di tasa di criminalidad, ta considera hopi factor contextual manera e condicion socioeconomic, composicion demografico, normanan cultural, marconan legislativo, contexto geografico,  influencia historico y factor tecnologico y di medio ambiente. A base di esaki, a determina cua ta e 7 islanan mas sigur den Caribe, conforme e iniciativanan legal di cada isla, pa asina mantene nan sigur pa turista. 

ARUBA NUMBER 5

Aruba ta figura na number 5 di e lista di 7, prome cu Bonaire cu ta na number 6, y e ultimo ta St Lucia na number 7. Segun e calculacion haci, e tasa di criminalidad pa cada 100 mil habitante ta 36. E ta bisa cu Aruba tin leynan estricto y regulacionan funcionando pa sigura e seguridad y proteccion di su residente y bishitante. “Polis ta hopi activo   den enforsa e leynan aki, contribuyendo na un sentido di seguridad”, e portal ta sigui bisa. E tasa di homicidio ta 2, di robo 3, y e ta figura na nivel 1 di seguridad segun departamento di estado Mericano. E isla mas safe, ta Anguila segun e portal. Corsou no ta aparece riba e lista aki, segun e portal.NOTA: E potret cu ta acompaña e articulo, ta cortesia di e portal en cuestion, the travel.com