Na Aruba doño di cacho Khaleesi ta cana liber, y na Corsou a detene homber cu a tira cacho mata

WILLEMSTAD – Mientras cu na Aruba, ta wardando kico Ministerio Publico ta bay haci cu e doño cu a maltrata su cacho Khaleesi, te cu e la muri, na Corsou, polis a detene un homber cu a tira un cacho mata. Tabata diadomingo pasa den e bario di Kanga, cu e homber aki di 31 aña a menasa un otro homber cu arma y maltrat’e y tira su cacho mata. E la bira fugitivo, pero finalmente diahuebs mainta 7’or polis a pone man riba dje na Suffisantweg. Despues a tene un entrada hudicial na su cas na Kanga. E homber ta deteni, pendiente e resultado di e investigacion.  

ARUBA

Mientrastanto e siman aki minister di naturalesa, Ursell Arends a bisa den e progama Noticiacla LIVE, cu e homber cu a causa e maltrato di su cacho Khaleesi y cu a fayece despues, su destino ta den man di Ministerio Publico. Contrario na Corsou, polis no a detene e persona sino a simplemente interogue y lague bay. Esaki a causa consternacion den comunidad cu ta sinti cu e persona aki mester haya su merecido castigo, y uno halto. Lamentablemente e leynan na Aruba pa casonan asina ta ‘deficiente’ unda cu un castigo maximo por ta 6 luna cera, pero den e caso aki, ta mustra cu e homber lo haya castigo minimal. Esaki segun expertonan legal cu a repasa e caso. 

DIFERENCIA DI CASO

Hopi por argumenta cu e caso ta diferente na Corsou, unda cu a tira un cacho mata, y aki na Aruba e persona no a 'tira' su cacho mata. Pues no por compara e caso. Di otro forma, otro ta pensa cu maltrato ta maltrato y den e caso aki, e cacho en cuestion na Aruba a resulta morto toch, aunke 'no intencionalmente' si wak e di aspecto legal. Asina mes, hopi lo wak e cu otro wowo, emocionalmente y ta sigura cu e homber na Aruba mester di un castigo severo, ya cu su accion a conduci tambe na morto di e cacho. Tambe tin e comentario cu esaki no ta e prome caso, sino cu tabatin hopi mas prome cu ne, cu no a haya atencion y cu ta solamente pasobra e persona aki tabatin un tinte 'politico' y ta un persona conoci den comunidad, cu e la haya asina hopi atencion.