Pa wega di manipulacion, no ta reuni mas cu minister

ORANJESTAD – E grupo di persona cu ta yama nan mes ‘Right Hand Driver Community (RHD)’ a confirma ayera cu nan no ta sinta mas cu gobierno (lesa minister Arthur Dowers di husticia) riba e tema aki. Nan presidente y vocero Cristian Soto a confirma esaki na NoticiaCla.com awe, y a splica pakico. Manipulacion di e loke a sosode durante nan prome y unico reunion a pone nan tuma e decision drastico ey. Asina tambe nan ta contesta e minister su declaracion durante e noticiero ‘noticiacla merdia’ na Power FM 101.7 cu Tito Lacle y Ruben Garcia.

NOTICIERO

Tabata durante e noticiero ey, cu a pasa e grabacion di un entrevista cu e mandatario, cu ta bisa cu e e grupo no a bolbe pa un di dos encuentro y e no sa pakico nan ‘no a presenta’. E grupo a manda como tal, e carta den cual nan ta splica nan punto di bista, ‘pakico no ta sinta mas cu e mandatario’.

RELATO INCORECTO

Segun Soto, despues di e prome reunion cu Dowers, su despacho a manda un relato di prensa, cu no ta cuadra cu e berdad. “E tabatin un descripcion incorecto”. Ademas segun Soto, ‘A usa un foto pa crea impresion cu e reunion a bay den un ambiente hopi positivo”. Esey no ta corecto segun e presidente di RHD Community.

COMISION

Ademas e hecho, -segun Soto-, cu a lanta un comision pa atende solamente e problema di RHD, no ta berdad. E intencion tabata pa lanta un comision cu lo a investiga tur aspecto di seguridad y no solamente RHD. Asina lo por a demonstra cu e problema di trafico no ta sinta na RHD sino otro aspectonan di trafico. Ademas, e motibo pa e reunion, no tabata pa ‘laga introduci e landsbesluit’ y tambe RHD no ta di acuerdo cu e adaptacion di RHD.

MANIPULACION

Como tal, RHD Community no ta participa na wega di manipulacion y como tal ‘no ta dispuesto pa sigui discuti e tema cu e minister’. Nan ta contra paro di e autonan RHD y lo bringa esaki te na Hoge Raad si mester. NOTA: E FOTONAN CU E ARTICULO, TA SACA DIA 21 DI MEI ULTIMO, Y NO TA ACTUAL. ESAKI TA E FOTONAN CU SR SOTO TA REFERI NA DJE, CU SEGUN E, A WORDO USA PA CREA IMPRESION ERONEO. Lesa e carta completo manda pa minister, aki.