Portal ya ta propaga cu matrimonio di pareha di mesun sexo na Aruba ta legal

ORANJESTAD – Mientras cu na Aruba ta pendiente pa e sentencia di Corte di Casacion riba matrimonio di mesun sexo, y e hecho cu otro luna Parlamento ta trata e ley mes, ya tin portalnan internacional cu ta propaga cu matrimonio di mesun sexo ta legal na Aruba. Noticiacla a wordo informa pa personanan conoci cu e tema riba e noticia di e portal aki, riba e informacion aki, cu ta confuso y por crea malinformacion pa nos isla. Ademas, e notificacion ta sali di un raportahe di un portal conoci den e mundo aki di LGBTQ+, unda cu Aruba ta figura den e top 9 destinacionan den Caribe mas pro LGBTQ+. Ta den e raportahe aki, ta informa eroneamente cu matrimonio di pareha di mesun sexo ta legal.  Ademas tin e biblioteca ‘cybernetico’ Wikipedia, tambe ta raporta cu desde 2022, matrimonio di mesun sexo ta legal na Aruba. 

ARUBA DEN TOP 9

E portal ta raporta riba e 9 destinacionan den Caribe, den cual Aruba ta figura como number 6 riba e tema, y esun prome ta Martinique. Corsou y St Maarten ta score mas halto cu Aruba, na number 5 y 3 respectivamente. Segun e portal, Aruba su ‘charme’ ta den e pueblo amigable y paisahe bunita, cu ta haci tur bishitante sinti welcome. “E compromiso di e isla pa cu hospitalidad ta evidente den su resortnan diverso y e actividadnan cu ta cater pa biaheronan LGBTQ+, sigurando nan un estadia cu alegria y aceptacion”.