Còrsou, St. Maarten y Banko Central a firma acuerdo riba puntonan prinsipal pa Ennia

WILLEMSTAD - Ayera Banko Sentral di Kòrsou i St. Maarten i gobièrnunan di Kòrsou i Sint Maarten a firma un akuerdo riba puntonan prinsipal (‘hoofdlijnenakkoord’) pa yega na solushon di e problemanan na ENNIA. Firmando e akuerdo akí konhuntamente, partidonan a logra yega, den bon kooperashon i na interes di e aseguradonan di ENNIA, na un solushon sostenibel pa e problema kompleho aki.

Durante próksimo lunanan lo konsentrá riba implementashon di e akuerdo. E proseso aki ta unu ekstenso. P’esei koutela ta di sumo importansia. Presidente di Banko Sentral sr. Richard Doornbosch a papia ayera di un dia positivo i asta festivo ku firmamentu di e akuerdo aki pa yega na un solushon di Ennia. Por papia di un “door start” saludabel pa e kompania por tin un futuro. E implementashon akí tin komo meta un restrukturashon ku ta enserá kontinuashon parsial di ENNIA, inkluso e servisionan di seguro di bida. E parti di aktividatnan di seguro di ENNIA ku lo ta meta di e kontinuashon, lo sigui pafó di e areglo di emergensia i independientemente di gobièrnu.

Kontribushonnan finansiero na largo plaso di Kòrsou i Sint Maarten i CBCS lo evitá tambe ku ta restringí pólisanan di penshun. Lo krea un Fondo di Resolushon relashoná ku e kontribushonnan finansiero aki. CBCS lo sigui informá e partidonan interesá di ENNIA na e mihó manera posibel tokante progreso di implementashon. Durante e implementashon, CBCS lo sigui salbaguardiá interes di kreditornan konhunto di grupo ENNIA, inkluyendo aseguradonan.

Minister di finansa sr.Javier Silvania tambe a papia di un solushon balansá i sostenibel ku a yega na dje. Promé minister sr. Gilmar Pisas a indiká ku gobièrnu mester a djòin Banko Sentral pa evitá un disturbio ekonómiko den nos pais. Si Ennia kai, sosiedat lo a sintié hopi pisá. Pa evitá un debakel finansiero i polítiko, gobièrnu a djòin Banko Sentral pa buska un solushon. Sr. Pisas a indiká ku e akuerdo aki ta konta ku sosten di CFT, Hulanda, parlamentonan di Kòrsou i St. Maarten komo tambe di gobièrnu di St. Maarten i di Kòrsou. P’esei presente ayera na Banko Sentral tabata minister di finansa di St. Maarten sr. Ardwell Irion i via di video-conference promé minister Silveria Jacobs di St. Maarten. Sra. Jacobs a dirigí su mes na Banko Sentral pidiendo pa pone bon bista riba instansianan finansiero pa e tipo di kosnan ku a pasa na Ennia pa nunka mas bolbe pasa. Kòrsou a keda perhudiká ku 25000 asegurado/penshonado ku loke a pasa na Ennia, i St. Maarten tin 5000 penshonado perhudiká. Mandatarionan a gradisí tur hende i koperashon entre paisnan ku ta dispuesto pa yega na solushon di Ennia. NOTA: Texto ta scirbi den Papiamento fonetico di Corsou.