Wever:  Realidad tristo: 99% di abuso sexual di mucha, e abusado ta famia of conoci!

Wever: Realidad tristo: 99% di abuso sexual di mucha, e abusado ta famia of conoci!

Posted on 04/11/2024 3:50 pm AST | Updated on 04/11/2024 3:51 pm AST

ORANJESTAD - E ta un berdad hopi tristo cu e problematica aki di abuso sexual di mucha ta cuminsa hopi cerca di cas mes, di esnan hopi cerca di un mucha. Asina prome minister Evelyn Wever Croes ta bisa den un comunicado. Segun e prome mandatario, for di un estudio haci, ta alarmante e cifra y informacionnan obteni di casonan di abuso di mucha. 99% di casonan na unda muchanan ta wordo abusa sexualmente, ta wordo abusa door di personanan cu e victima conoce. E por ta un amigo di cas, of amiga of amigo di mama y tata, pareha nobo, door di omo, door di welo, of padrastro. Esakinan ta personanan cu ta cerca di e muchanan y kendenan e muchanan ta confia. Personanan kendenan a mayornan a confia pa laga nan yiunan den nan cuido. 

PROBLEMA NO TA LEY, GOBIERNO OF HUES

Esaki ta un indicacion fuerte cu e problema mas serio no ta ley, Gobierno of hues. E problema mas serio ta den famia. Eynan nos mester enfoca. Eynan Gobierno no por drenta facilmente. Esey ta responsabilidad di cada famia, di cada persona cerca di e mucha cu e mucha ta confia. Por cambia tur ley pero si den famia e abuso sigui te hasta wordo permiti y tolera, nos ta sigui faya nos muchanan. Y ta hunto so nos lo preveni y combati e crimen aki contra nos menornan inocente. 

CONFRONTA E BERDAD

“Nos mester confronta e berdad aki, aunke cu e ta incomodo y delicado. Abuso hopi biaha ta socode door di personanan di confiansa, personanan cu mester ta esunnan cu mester brinda proteccion na nos muchanan. Nos por cuminsa pa evita 99% di e casonan aki door di wak miho cu kende nos ta laga nos yiunan y reconoce señalnan den e mucha of den esnan cu ta wak pa e mucha. Door di ta consciente, acepta loke ta pasando, y door di accionnan preventivo, nos por traha pa un futuro caminda cada mucha ta crede den un ambiente liber for di e garanan di abuso. Nos muchanan merece miho”, Prome Minister Evelyn Wever-Croes a expresa. 

  • Varadero
  • Postobon
  • Powered by SETAR