Parlamentario di MEP ta bisa minister di Raiz drecha RWZI of hala tras!

Parlamentario di MEP ta bisa minister di Raiz drecha RWZI of hala tras!

Posted on 04/11/2024 3:14 pm AST | Updated on 04/11/2024 3:15 pm AST

ORANJESTAD – Parlamentario di MEP Alvin Molina den un comunicado basta directo dirigi na e minister di partido RAIZ, Ursell Arends a mande ‘drecha’ e situacion na RWZI of hala atras. E la usa un palabra ingles mas ‘netchi’ pa expresa su mes, cu traduci na Papiamento kier men pupu. E parlamentario ta usa e expression ingles ‘Get your sh*t together’ pero enbez di usa e palabra sh*t, cu kier men pupu, e ta usa e otro palabra, manure cu ta mest (pupu di bestia bruha cu hooi cu ta wordo usa pa yuda fertilisa e tera).

RAIZ MES A BUSCA P’E

Molina den su comunicado ta recorda cu ta RAIZ mes a busca pa tin e combinacion di cartera ministerial, esta Naturalesa y Agricultura. “ Ken ta responsabel pa busca un solucion pa e problema aki? Segun ley ( Landsverordeing Instelling Ministers ) ta e Minister di Naturalesa tin esaki den su cartera. E mesun minister ta responsabel pa proteccion di naturalesa y promocion di agricultura. Un combinacion di topico cu e minister mes a boga p’e durante formacion di gobierno” Molina ta bisa textualmente. “Awe, dos aña y mey den gobernacion, nos ta tende cu nos Minister di Naturalesa a tira e serbete den ring y kier pasa awa di riool den man di Minister di Energia. Ta di lamenta cu esaki a bira necesario, mientras cu por a siña di e profesionalnan local y internacional con pa uza e awa segunda mano na bienestar di e agricultor” Molina ta sigui bisa.

GET YOUR SH*T TOGETHER

Na final, Molina ta splica cu ‘pa pueblo no ta haci un diferencia cua minister ta encarga pa deal cu awa di riolering’ “ A bira tempo si pa e minister presenta un plan aceptabel of laga otro hacie, no te momento pa hunga tref. ‘Get your manure together’!” Molina ta finalisa bisando, refiriendo na e ‘mest’ manera cu a keda splica anteriormente. 

E PROBLEMA DI RWZI

Awa di riolering, Riool WaterZuiveringsInstallatie (RWZI) ta un problema na Aruba, Molina ta recorda tur hende. “ Di otro banda, nos ta mira cu tin scarsedad di awa pa agricultura, cual ta un otro problema na Aruba. Dos problema serio, mientras ambos por ta un solucion pa e otro, uzando un bon sistema di filtracion” e ta sigui bisa. 

 

  • Varadero
  • Postobon
  • Powered by SETAR