CAFT: Adapta presupuesto 2024 pa inclui surplus di 200 miyon di 2023

CAFT: Adapta presupuesto 2024 pa inclui surplus di 200 miyon di 2023

Posted on 04/10/2024 10:27 am AST | Updated on 04/10/2024 11:04 am AST

ORANJESTAD - Den su conseho recien tocante di e di dos modificacion di presupuesto stipula 2023 (BW), e colegio di supervision financiero CAft a indica cu e ta anticipa resultadonan positivo inespera adicional. Cu e di tres raportahe di ehecucion (UR) ta confirma e imagen aki. CAft ta anticipa cu Aruba lo por cera e aña cu un surplus di financiamento di mas cu AWG 200 miyon pa e sector colectivo, loke ta 3 porciento di e producto nacional bruto (bbp). CAft ta conseha Aruba pa emplea e resultadonan positivo inespera pa amortisacion di debe, loke ta necesario pa baha e presion presupuestario di e gastonan di interes y pa crea espacio pa otro gastonan necesario. Enbista di e hecho cu e resultado lo sigui impacta na 2024, CAft ta pidi boso pa adapta e presupuesto na e dato aki den e prome BW 2024.

SPLICACION

Pa 2023, CAft ta anticipa un saldo di financiamento di mas cu 3 porciento di e bbp, cu loke ta cumpli ampliamente cu e norma di 1 porciento di e bbp. E surplus di financiamento mas alto aki ta debi na resultadonan positivo inespera bastante alto pa e partidanan di impuestonan directo (impuesto riba ganashi y impuesto riba salario), impuestonan indirecto (impuesto riba riba volumen di benta di empresa (BBO), derechonan di consumo y derechonan di importacion) y sobra ingresonan (impuesto pa turista y impuesto riba divisa).

Den caso di diferencianan di interpretacion entre e traduccion na Papiamento y e version hulandes di e conseho, of den caso di proceduranan hudicial of trayectonan di escalacion en virtud di regulacionnan aplicabel, e version original hulandes semper ta esun preferente.

Tambe pa e sobra entidadnan di e sector colectivo tin resultadonan positivo inespera. Asina, na 2023 e resultado di e Aruba Tourism Authority (ATA) ta AWG 20 miyon mas alto di loke a presupuesta.

Den su conseho tocante di e BW, CAft a constata cu na 2023, Aruba no ta cumpli cu e norma di gastonan di personal y a conseha pa tuma e medidanan necesario. Sinembargo, e di tres UR ta mustra cu e realisacion di e gastonan di personal ta atrasa respecto di e presupuesto. Si e tendencia aki ta continua den e di cuater kwartaal di 2023, ta alcansabel pa logra e norma di gastonan di personal pa 2023. E desaroyo di e compensacionnan pa overtime, pa loke a reserva AWG 5 miyon adicional en e BW, lo ta decisivo den e marco ey.

CAft ta remarca cu e realisacion di inversionnan no ta alcansa e nivel spera. Te cu e di tres kwartaal di 2023, a realisa AWG 3 miyon na inversionnan, mientras cu e obligacionnan pendiente ta AWG 49 miyon. CAft ta constata cu tin un riesgo real cu ta gasta di menos.

E debe nominal di Aruba – despues di un bahada di AWG 131 miyon den e di dos kwartaal – a sigui baha den e di tres kwartaal cu AWG 11 miyon te AWG 5.619 miyon. Na final di e di tres kwartaal, e ratio di debe tawata 82 porciento di e bbp. Cu e resultadonan positivo inespera adicional cu ta anticipa pa 2023 y e surplusnan di financiamento den e añanan venidero, Aruba por sigui baha e debe nominal substancialmente. Asina, realisacion di e norma pa e ratio di debe di 70 porciento di e bbp na 2027 ta bira alcansabel. Esaki ta positivo. Bahamento di e debe ainda ta di importancia, considerando e gastonan di interes alto cu na 2023 ta 17 porciento di e presupuesto y cu ta sigui aumenta na 2024. Por lo demas, CAft ta remarca cu na final di e di tres kwartaal aproximadamente 51 porciento di e debe nacional ta ubica na e mercado nacional. Como consecuencia di esaki, e presupuesto ta menos sensibel pa desaroyonan di e interesnan. Esaki tambe ta positivo.

Finalmente, CAft ta keda enfatisa cu ta importante pa entrega e informenan di implementacion na tempo. Apesar di varios peticion di CAft pa respeta e plaso prescribi den e LAft pa entrega di e UR, tambe e di tres UR a ser entrega cu bastante retraso.5 E hecho cu awor ta entrega e informenan di implementacion demasiado laat structuralmente, ta limita tanto CAft como Parlamento di Aruba den e posibilidad pa por evalua durante e aña si e presupuesto ainda ta realistico of encambio ta rekeri modificacion. Di e manera aki, ta limita e derecho di presupuesto di Parlamento. Click AKI pa wak e raportahe completo. 

 

 

  • Powered by SETAR