Bergen: Caso mayornan precupa vs SKOA ta fin di luna

ORANJESTAD – E caso di cu un grupo di mayor precupa a entama contra Stichting Katholiek Middelbaar Onderwijs ta tuma lugar fin di luna. E vocero di e grupo, Luigi Bergen a confirma esaki na NoticiaCla.com ayera nochi. Segun Bergen, e fecha cu corte a reserva ta dia 25 di juni proximo den oranan di mainta. E caso ta sigui, no obstante cu gobierno y SKOA mes a yega na otro recientemente y unda cu SKOA a sigura cu no ta cobra e suma completo e aña aki na schoolgeld.

CUPO DI ALUMNO

Segun Bergen, e caso tin tur derecho di continua pasobra ‘nos kier garantisa e cupo di cada alumno na su propio scol, mientras nos lo debati contribucion di mayor’. Bergen ta sigui bisa cu nan como mayor, ta esnan perhudica y no gobierno.

SITUACION NOBO

E hecho cu e problema ‘inicial’ ta resolvi, no ta exactamente berdad segun Bergen a sigui splica. “SKOA y gobierno hunto a aumenta e schoolgeld mas ainda”. Y asina Bergen a sigui motiva e motibo. “Na prome instante SKOA a aument’e (schoolgeld) di 75 pa 250 pa aña escolar 2015-16. Hunto cu gobierno, a aument’e di 75 florin pa 350, parti den dos aña escolar, esta 2015-16 y 2016-17; un aumento di 100 florin mas pa cada mucha!”.