Lider di partido AVP ta insisti cu por y lo aumenta pensioen cu 50%

ORANJESTAD - Despues cu a scucha Minister Dangui Oduber y miembronan di Parlamento di MEP bisa cu e aumento di pensioen cu 50% cu e partido berde a anuncia anteriormente, diadomingo e lider di e partido berde Mike Eman a bolbe insisti cu ‘lo aumenta pensioen cu 50%’. Obviamente, esaki lo ta si nan logra drenta gobierno den futuro. Segun Eman, e reparatietoeslag cu nan a introduci lo ta e vehiculo primordial p por bai alcansa e aumento di pensioen di nos grandinan, e lider di AVP, mr. Mike Eman a splica. Partido MEP su miembro Tevreden a sigura cu e gabinete actual a sa di aumenta e pensioen 4 biaha caba, pero den un forma responsabel, y lo haci esaki atrobe na 2025. 

RICIBI MAS PLACA

Segun Eman, gabinete Wever-Croes ta ricibiendo 500 miyon mas na entrada na 2023 compara cu Gabinete Mike Eman na 2017. “ Esaki ta duna nos espacio financiero cu prioridadnan corecto pa percura pa e placa di pueblo yega serca esnan cu mas mester di dje,” Eman ta invatisa. Segun Eman, durante e periodo di Gobernacion di Gabinete Mike Eman I y II a utilisa e instrumento di reparatietoeslag pa pone un suma riba salario minimo, pensioen y bijstand. “E suma aki cu ta sali for di presupuesto di gobierno mes ta esun cu nos ta bai aumenta substancialmente pa alcansa e 50% di aumento”, Eman ta splica.