Screening ministernan pa gobierno nobo di St. Maarten porfin ta den fase final

PHILIPSBURG - Den wikènt tras di lomba porfin informashon verídiko a drenta ku ta duna un indikashon ku e proseso di formashon di un gobièrnu nobo pa St. Maarten ta yegando den su fase final. Ta spera ku pa fin di e siman aki e seremonia pa hura e ministernan nobo di gabinete Mercelina i ta tuma lugá.

Esaki despues 28 mart último gobernadó Ajamu Baly a bolbe duna formadó, Luc Mercelina (URSM) un prolongashon di e periodo di formashon te 26 aprel awor. Segun informashonnan ku ta bai rònt e proseso di screening awor si ta práktikamente kla.

Ta solamente riba un relato final di servisio di seguridat, VDSM ta wardando. E servisio aki ta entregá su relato na Ministerio Públiko i e último aki lo pone e kontenido na konosementu di gobernadó i formadó.

Informashonnan di screening risibí ta konserní Mercelina mes ku ta kandidato pa bira promé minister. Rondó di Mercelina mes tabatin diferente informashon ta sirkulá ku e no ta inkliná pa pone su ofisina di dòkter riba un distansia i tabata di opinion ku e por a sigui drei esaki den kombinashon ku e puesto di promé minister.

Veronica Webster (URSM) ta kandidato pa minister di Salubridat Públiko, Desaroyo Sosial i Labor i Grysha Heyliger-Marten (DP) ta kandidato pa minister di Turismo, Asuntunan Ekonómiko i Telekomunikashon. Otro resultadonan di screening ku tambe a drenta ta Marinka Gumbs (DP) ku ta kandidato pa bira minister di Finansa, Raeyhon Peterson (PFP) ku ta kandidato pa bira Minister di Bibienda Popular, Planifikashon Urbano i Medio Ambiente, Christophe Emmanuel (NOW) ku ta kandidato pa bira minister di Edukashon, Kultura, Hubentut i Deporte i Lyndon Llewis NOW) ku ta kandidato pa bira minister di Hustisia.

Patrice Gumbs (PFP) i Gracita Arrindell (URSM) ta kandidatonan pa minister plenipotensiario i minister plenipotensiario suplente na Den Haag. Pa NOW Claudius Buncamper lo drenta parlamento pa remplasá Emmanuel, pa URSM Richinel Brug lo remplasá Mercelina i pa DP Viren Kotai lo remplasá Heyliger-Marten.

Na fin di mart Mercelina den un deklarashon pa prensa a bisa ku e ta rekonosé e preokupashon kresiente den komunidat relashoná ku e fecha ku lo hura ministernan di e gobièrnu nobo. Ta for di 12 yanüari un mayoria den parlamento a firma un akuerdo di disponibilidat pa traha huntu miéntras ku 21 di febrüari e akuerdo di gobernashon a keda kla i ratifiká pa e mayoria ku ta formadó un gobièrnu nobo.

“Adishonalmente ta asina ku e kandidatonan pa minister mester sigui warda riba resultado di e proseso di screening kaminda tur instansia manera Prokurador General i servisio di seguridat, VDSM konforme lei ta risibí e informashonnan relevante.”. NOTA: E texto ta scirbi den papiamento fonetico di Corsou.