Paisnan ta uza ‘beachnan di Aruba’ comosifuera ta di nan

ORANJESTAD — Un proyecto pa ‘inmortalisa’ e beachnan bunita di Aruba, a tuma un buelta sorpresivamente diferente. Ayera e vespertino ‘Amigoe di Aruba’ a raporta riba e hecho aki prome. E vespertino ta raporta riba esaki indicando cu ta trata di un proyecto di potret di varios beach di Aruba, cu a wordo distribui internacionalmente como material pa uso liber. Loke a sosode sinembargo, a gara tur hende di sorpresa. Por lo menos 12 pais, incluyendo Corsou, a uza e potretnan y pretende cu ta trata di beachnan di e respectivo paisnan. Aruba Tourism Authority a traha un video di dje, pa ilustra kico tur a sosode despues. Y e resultado ta remarcable. CEO di ATA, Ronella Tjin –Asjoe a confirma e asunto na NoticiaCla.com. E video mientrastanto ta hayando hopi hits riba e.o. YouTube.

E PROYECTO

E intencion tabata pa invita conoci fotografo internacional, Juan Salvarredy, for di Argentina pa Aruba pa saca potret di e beachnan mas conoci y importante di Aruba. E potretnan aki a wordo poni riba algun di e banconan di dato digital, manera Shutterstock, iStock, Flickr y Getty Images. E potretnan tabata liber di derecho, pues tur hende por a download esakinan, y uza nan pa cualkier meta necesario.

SORPRESA

E intencion di ATA pues, tabata pa demostra cu Aruba tin e beachnan mas bunita di mundo, pero e la dal un buelta sorpresa. Y a documenta e resultado riba un video. Paisnan manera Corsou, Trinidad, Islanan Cayman, Bahamas, Miami y mas a uza e potretnan di beach di Aruba y haci como si fuera e ta nan beach. Ora cu e narado di e video puntra, ‘bo sa kico tur e beachnan aki tin en comun: Tur e beachnan aki ta situa.. na Aruba”.

USA POTRET

A resulta cu algun siman despues cu a pone e potretnan riba e sitionan cybernetico menciona, esakinan a wordo uza masalmente pa otro paisnan, pa pretende cu nan tin e beach pues. Un website Urlaubspiraten, a uza p.e un potret di eagle beach, pa promove buelonan pa Corsou. Hotelnan na Trinidad, segun website Hotelopia.com, diripiente ta aparece riba Baby Beach na Sero Colorado. Europcar.com a pone potret di Palm Beach pa huur auto riba Islanan Cayman. Y oficina di real estate na Miami a uza e potret di pier di Palm Beach pa propaga vivienda na Miami.

BEACHNAN BUNITA

Segun ATA, e potretnan di Salvarredy a wordo uza pa promocion di mas di 12 diferente pais, tanto den forma di corant, magazine como online. “Hasta gobierno di Puerto Rico ta uza un di nos potretnan riba nan website oficial”. Mira e video aki.