Analysis: Caso Khaleesi: Nos estado di moralidad kizas ta mas importante cu e ley

E asunto di e cacho neglisha, cu finalmente a muri pa via di maltrato di su doño a lanta hopi discusion den nos comunidad e siman aki. Hopi mes! Lastimamente e enfoke a bai mas riba e ley cu lo ta deficiente y cu lo mester wordo cambia mas liher cu ta posibel, y menos riba e moralidad den nos comunidad. E pregunta ta, cu den e caso aki loke a sosode, si ta trata di un asunto legal so of no. E parti positivo ta si, cu un gran parti di nos comunidad a keda hopi rabia cu e asunto aki,mustrando cu nos no ta dispuesto pa tolera e tipo di casonan aki mas. Mester corda cu un ley den hopi caso ta un refleho di pensamento di e sociedad: nos tur ta haya por ehempel, cu nos no mester horta cos di otro, pues nos ta ankr’e den un ley. Un ley tin su parti di  "enforsa" tambe pues con bo ta haci’e pa tur hende atene nan mes na dje. Di otro banda, por ehempel, nos no tin un ley cu ta bisa cu si nos wak un machi bieuw trompica cay riba caya nos mester juda lant’e. Pa esei nos ta apela na nos balornan y cultura, y no na un ley.  Mahatma Ghandi a jega di bisa  : 'The greatness of a nation and its moral progress can be judged by the way its animals are treated". Apesar cu e ley ta importante, nos estado di moralidad ta kizas mas importante ainda. E hecho cu atrocidadnan ta (sigui) tuma lugar den nos comunidad (y no solamente riba abuso y maltrato di cacho) ta siña nos cu manera Dr. Rene Rœmer a jega di bisa den su buki, nos ta "un pueblo na caminda", pero no no tey ainda. Nos falta hopi ainda.. 

Scirbi pa Tito Laclé