Parkeermeter ta den operacion fin di luna

ORANJESTAD – Pa fin di luna aki, Aruba lo sera conoci cu e concepto nobo di parkeer, cu uso di parkeermeter. NoticiaCla.com a haya confirmacion awe mainta cu enberdad e prome tanda di e 105 parkeermeternan ta na Aruba, y a cuminsa instala e prome 25. “Si tur cos ta bon, mi kier cuminsa e operacion pa fin di e luna aki. Esaki pendiente claro, e leynan necesario” director di Arubus, Teo Croes a sigura NoticiaCla.com awe mainta. Aworaki por solamente mira e basenan (potret), y pa fin di luna lo pone e meternan mes.

LEY

Un di e problemanan mas grandi, ta e hecho cu ainda no a pasa e ley cu ta legalisa e operacion di e meternan, y mas importante, duna esnan encarga cu control y multa, e autoridad pa haci nan trabou. Tanten cu e ley no pasa, esaki no por drenta den ehecucion.

MARCA VAK

Algun tempo pasa, a cuminsa marca varios di e vaknan pa autonan parkeer. Esaki a keda cla mientrastanto, pero despues e proyecto despues a pega atrobe. For di algun dia, a cuminsa cu e instalacion di e meternan, y e promenan ta wordo instala awor den Wilhelminastraat. Lo percura pa Playa haya tur nan meternan prome, y despues lo sigui pa e area di hotel. Segun Croes, ta trata di un total di 85 meter cu lo keda Playa, mientras cu e resto lo wordo reparti pa e parti hotelero na Palm Beach y algun lo haya destinacion pa cierto lugarnan ‘priva’. No ta conoci unda esaki lo ta, segun Croes, pasobra ainda ta den negoshacion cu e personanan aki.