Asiel di bestia na Corsou ta cera su porta pa falta di fondo

WILLEMSTAD - Despues di hopi deliberashon interno, direktiva di ‘Stichting Dierenbescherming Curaçao’ (SDBC) – hustamente den su di 75 aniversario – ta hañ’é obligá pa sera e asil di bestia na Parera. E aktividatnan di e fundashon lo konsentrá awor riba ehekushon i kordinashon di proyektonan di sterilisashon i di edukashon.

E direktiva bou di presidensia di Maria Garcia ta lamentá altamente ku e mester tuma un desishon asina drástiko, pero nan no ta mira salida mas for di e problemanan finansiero ku ta birando kada bes mas grandi. Pa basta tempu kaba e fundashon ta sintá ku un supsidio di gobièrnu ku no ta yega pa kubri e gastunan operashonal diario di e asil (kuminda, remedi, limpiesa etc.); ni tampoko despues ku a subi e supsidio ku algun resientemente. Ta bini aserka ku e entradanan for di donashonnan último añanan tambe a baha drástikamente, entre otro pa motibu di atakenan inhustu di otro organisashonnan ku ta yuda bestia i nan mes, pero no komunidat di Kòrsou, manera SDBC a  hasi pa dékadanan kaba. A konsiderá tur posibel opshon pa buska un solushon. Intensivamente a buska fuente nobo di fondo, miéntras ku na mes momento a kòrta te den ekstremo den e gastunan pa por tene kabes riba awa. E fundashon aki su meta no ta di hasi ganashi sino di yuda bestia i di yuda pueblo di Kòrsou ku problema di bestia. SDBC ta konfrontando tambe ku preisnan ta subi, inkluso di kuminda i remedi pa bestia.

Pero na dado momento tur posibel solushon ta agotá. Apesar di intentonan serio pa purba evitá un destino fatal, awor e direktiva no ta mira otro salida mas pa hiba un maneho responsabel na e asil. Den e kuadro aki e fundashon a kuminsá informá e personal ku nan retiro ta na kaminda. Un konsekuensia inmediato di e desishon aki ta ademas ku e asil no por tuma niun bestia nobo mas. Pa e bestianan ku ainda ta den asil, den e tempu binidero lo buska hende pa adoptá nan.

Seramentu di asil ta un sla duru. Kasi henter Kòrsou, a lanta ku eksistensia di e asil komo e refugio pa bestianan lagá pa nan kuenta, i pa solushoná e problemátika kaminda nan ta kousa disturbio i molèster. Durante tres kuart siglo e fundashon no a sirbi únikamente e bestianan grandemente, pero e komunidat di Kòrsou en general tambe, manera polis, empresanan i gobièrnu. Ta realisá insufisientemente ku e ehérsito di kachó i pushi di kaya no ta solamente un riesgo grandi pa seguridat i salú di hende, pero tambe pa medio ambiente, pasobra den nan ansha pa buska kuminda, e bestianan aki poko-poko ta eradikando otro kriatura den naturalesa.

E fundashon lo sigui ku e proyektonan ku finansiamentu eksterno, esta e programanan ku ta organisá den bario pa sterilisá i chip pushi i kachó, i duna edukashon na skolnan pa siña nos muchanan i informá komunidat kon kuida nan bestianan di kas i animalnan en general. NOTA: Texto ta scirbi den Papiamento fonetico di Corsou.