IATA: Demanda internacional pa biahamento a aumenta cu 21 porciento

NEW YORK – E demanda mundial pa biahamento, midi den RPK (  (revenue passenger kilometers), a aumenta grandemente den luna di februari di e aña aki, specificamente cu 21.5% compara cu aña pasa. Cu esaki, e cifranan ta mas halto cu prome cu e pandemia. Asina e portal di e agencia di aviacion IATA ta anuncia diahuebs. E demanda ta subiendo mas hopi cu e capacidad disponible y pesey avionan ta mas yen. E grado di ocupacion di avionan tabata na 80.6% na februari cu ta mas cu aña pasa. E demanda ta mas grandi den paisnan asiatico, sigui pa destinacionan Europeo y finalmente Merca. 

MAS CARO

Segun presidente di IATA Willie Walsh, ta spera cu politiconan abstene di saca probecho financiero cu aumento di impuestonan, cu por desrumpi e trayecto positivo aki, y haci biahamento mas caro ainda. E ta mustra sinembargo cu biahamento pa Europa lo bira mas caro debi cu tin intencion di aumenta impuesto, segun varios propuestanan haci.