Viva La Musica Latina Curacao tey pa keda!

WILLEMSTAD – E prome edicion di Viva La Musica Latina Curacao (VLMLC) ta tras di lomba. Y for di e comentario di e organisado/promotor di e evento, -Stephen Hudson-, e ta riba caminda pa un continuacion y programa pa 2016. Un evento completamente nobo cu, -huzgando for di e reaccion di e fin di siman cu a pasa-, a mustra cu e tin tur derecho di existencia. Y cu e empuhe necesario, e lo por bira e proximo evento grandi di Corsou, banda di Curacao North Sea Jazz Festival. NoticiaCla.com como un di e invitadonan di e festival, (cortesia oficina di turismo di Corsou), tabata presente y a percura pa e siguiente relato.

FORMULA

E formula di e festival, tabata uno diferente cu otronan conoci. Manera cu Hudson a propaganda e evento for di un comienso, e mester tabata un total di 8 ‘diferente concierto’ riba un solo tarima, reparti den 2 anochi largo. Na final di e evento, por mira atras riba dos anochi di gozo total, y un aceptacion di miles di hende tanto local, como internacional. E sitio (parkeerplaats di e centro comercial Sambil) tambe a mustra cu e tabata apto pa e evento, aunke cu no ta sigur cu lo tene na e mesun sitio otro aña. E decision ey tin cu wordo tuma ainda.

LINEUP

E line up di artista tambe a demostra di a goza di aceptacion di e publico. Por a midi esaki ora cu mayoria di e publico a opta pa keda te na final tur dos anochi (e festival a caba den oranan tempran di marduga). E prome anochi Jorge Celedón a logra mantene e publico den un trans completo te na final. E di dos anochi, e artista Alberto Barros a logra mesun cos, esta wanta e publico atento te final. Y entre nan, un sin fin di artista a logra di saca cara y deleita nan respectivo publico.

ORGANISACION

E organisacion Showbizz International di Hudson, a percura pa durante un aña largo, programa e anochinan aki y laga e comunidad sinti e ambiente Latino y demostra, manera e mes a bisa, ‘laga nos baila.. nos gusta baila.. e ta den nos sanger’..

PROME ANOCHI

Riba e prome anochi, un total di 4 grupo a toca, cuminsando cu e grupo bou direccion di e grandi George Colina y su All Star. Un formula cu a resulta exitoso y a duna artistanan local un chens pa luci manera cu nan so por. Gilberto Santa Rosa a continua y a demostra cu ainda e ta e persona cu por gara tur e damanan y pone nan den su plant’i man. Na final di su presentacion, e la duna un ñapa pa medio di un rap, mustrando cu e por deleita e hobennan tambe. Su repertorio a varia di temanan nobo y e grandinan di pasado. Grupo Guaco tambe a uza e mesun formula, di trece hoben y grandinan hunto. Gustavo Aguado, un di e fundadornan di e grupo (1968) ainda ta cu e grupo y a mustra cu e tin e sabor ainda pa maneha e grupo, mei mei di e dos rumannan Ronald Borjas, y Luis Fernando Borjas. E anochi a finalisa cu e grandi di vallenato, Jorge Celedon. E la tene tur hende den su gara, y hasta comberti e promotor den un amante di su musica. “Despues di e anochi ey, mi a bira un fan di su musica”, Hudson a admiti.

DI DOS ANOCHI

Cu e prome anochi tras di lomba, tur wowo tabata riba e di dos anochi, unda cu e artista pa hopi, tabata Olga Tañon di Puerto Rico, cu su grupo. Prome cu esey, e grandi y amante di Corsou, Jose Alberto El Canario, a haci su ‘cos’ y habri e di dos anochi riba un nivel halto. Canario a demostra cu e tin su siguidonan despues di tur e añanan cu e la bin Corsou. E proximo pa entretene, tabata Olga Tañon. Usando su tactica di personaliza e evento y haci como si fuera ta un evento ‘priva’ entre e y e publico, e la sa di crea un atmosfera ‘cozy’ y constantemente sinta cu e publico riba e tarima y presenta su repertorio. Aunke e tin su tempo ta haci esaki, e la mustra cu e ta conciente di su ‘edad’ y no a sconde esaki ningun rato. Su exitonan di pasado a trece gozo serca esnan presente y a demostra pakico Olga tabata Olga. A sigui e leyenda El Gran Combo, unda cu e fundador Rafael Ithier (89) ainda tabata presente y a mustra cu e t’ei keto bay y lo cumpli 90 aña proximamente. E musica di El Gran Combo di Puerto Rico a zona sin un fayo y e musica asina cristalino cu tabata parse cu ta un disco compacto tabata zona. Un pa un, e exitonan tabata zona e anochi ey. E anochi a finalisa cu e conocido Alberto Barros, conoci cu ta toca temanan di otro cantantenan, y sigur esnan manera cumbia colombiano y e salsa tambe. Porta desconoci pa hopi, Barros den publico tabatin su seguidornan y a keda specialmente pa mira e grandi aki te na final di e anochi final di e festival.

CRITICA

Mientras nunca por scapa di critica, e ‘overall’ comentarionan tabata sumamente positivo. Esnan cu a bin, tabata sa kico nan lo a haya, y a haye tambe. Un anochi yena cu bon musica, y bon ambiente. Cuminda, bebida y un sin fin di musica Latino. Si e organisadonan a gana placa, no ta conoci. Si nan ta ripiti e evento, ta probable. Si e lugar ta keda Sambil, tampoco ta conoci. Loke si ta conoci, ta cu esnan cu a bay, a goza. E otro preguntanan, por lo pronto tin cu warda prome cu nan por haya contesta. Di tur forma, e festival a pone hende move. Y na final, esey ta e idea di e promotor, ‘Steve Hudson’.