CMB Youth Ranking Tournament 2015 a inicia exitosamente

Oranjestad - Durante fin di siman e prome categoria di hobennan entre 10 cu 14 aña a competi den e 'Caribbean Mercantile Bank Youth Ranking Tournament 2015'. Segun miembro di comision tecnico di ALTB, Monique In 't Veld hasta e categoria di 'mini' tabata hopi exitoso, "den e ultimo competencia mini tabata tin 4 participante solamente y a biaha aki e grupo a crece cu 15 muchanan entre 5 cu 10 aña cu awor tambe tin nan propio ranking".  Presidente di ALTB, Sr. Ronald Tchong a informa cu durante siman e cantidad di inscripcion pa e torneo aki tambe a subi pa un total di 90. Den e prome categoria di 10 pa 14 aña un total di 29 mucha a competi y pa e hobennan cu kier participa den e categoria entre 12 pa 18 aña por inscribi ainda te cu diaranson, 3 di Juni. Den e categoria di U-10, Hugo Fidler a sali na di 4 luga, sigui pa Gijs Fidler na di 3, Rudy Richardson na di 2 luga y como ganado di e categoria a keda Dustin Croes. E mucha muhenan tambe a hunga tremendo wega, caminda cu Melanie Figaroa a sali na di 4 luga, Danna Nuñez na di 3, Aethielle Kelkboom na di 2 y Kaela Solagnier como ganadora di e categoria G-14.  E partidonan di e categoria B-14 tambe a demostra e nivel halto di nos hobennan, unda cu  Alex Williams a keda na di 4 luga, sigui pa Jason Farro na di 3, na di 2 luga a keda Alexson Hessels y e ganado maximo a keda na participante Frederick Sydow. Tur participante a haci un tremendo papel durante nan weganan y a sa di demostra e tremendo talento entre nos hobennan den e deporte di tennis aki na Aruba.  Caribbean Mercantile Bank N.V. tambe tabata presente durante e partidonan diadomingo di e prome categoria aki y a keda impresiona cu e desaroyo di e deporte entre e muchanan y e nivel di e torneo organisa pa ALTB. "Nos ta hopi contento cu cantidad di inscripcion y e asistencia na e competencia aki den su prome siman. E muchanan a demostra hopi interes den e deporte, den competencia sano y sigur nan 'ranking' tambe pues nos no tin duda cu nan lo yega leu y lo sa di representa Aruba den exterior", asina Ilan Lopez, Marketing & PR Officer di CMB a expresa. Aruba Lawn Tennis Bond y Caribbean Mercantile Bank N.V. ta felicita tur mucha cu nan participacion den e prome siman di e torneo y ta invita demas hoben entre 12 cu 18 aña pa inscribi prome cu diaranson, 3 Juni 2015 pa e 'CMB Youth Ranking Tournament 2015'.