Dowers: Lo draai bek decision di ziektemelding na KIA

ORANJESTAD – Lo ‘draai bek’ e decision di ziektemelding na KIA, y haci esaki atrobe den un forma central enbez di serca e director directo. Esaki ta un di e acuerdonan temporal cu a keda stipula durante e reunion entre sindicato TOPA y minister di husticia Arthur Dowers awe mainta laat. Fuera di esey ta instala un comision di 3 persona pa evalua e varios kehonan cu tin. Y lo tin un periodo di pausa na KIA durante cual lo no introduci mas ‘regla nobo’.

REUNION CU SINDICATO

Despues cu un grupo di personal di KIA a bay den accion awe mainta tempran, e sindicato TOPA su presidente y algun shop steward a reuni cu e mandatario di husticia, riba e invitacion ricibi un dia anterior caba. Aki e mandatario a ricibi un lista di 18 keho nobo, banda di e lista di 15 keho caba cu e mandatario tabatin. E la admiti di no a haya chens pa repasa e lista nobo completo, pero a sinta repasa algun di nan awe mainta durante e reunion.

EVALUA KEHONAN DEN COMISION

A palabra cu e sindicato cu lo evalua e puntonan aki y cu lo nombra un comision di 3 persona cu den periodo di 2 siman lo tin cu analisa e kehonan y bin cu recomendacionnan pa e mandatario. Mientrastanto un di e puntonan cu minister a bay di acuerdo cune pues, ta pa drai bek e decision di meld ziek serca e director mes. Esey tabata causa problema pa algun persona cu no tabata sinti nan mes comfortable cu esey. E mandatario a dicidi cu ta bay cambia esey bek pa e sistema central di meld ziek. Pues awor no ta raporta mas directamente serca e director.

E mandatario ta considera cu awor e proceso di KIA ta den uno di informacion, y evaluacion, y cu e sindicato ta ‘commit’ su mes totalmente cu e acuerdonan aki.

SINDICATO REACCION

Di parti ta e sindicato, ta admiti cu a yega na un solucion temporal pa e accion di awe mainta. Bernabela ta papia di puntonan concreto cu tin cu tuma lugar den 10 dia. Tambe Bernabela ta papia di un lista di keho di 45 punto cu mester wordo atendi den apenas 10 dia di tempo, cu tin cu haya un feedback. “Dado momento cu nos wak y informa nos trahadonan, cu sra Hassell no compronde e señal cu minister Dowers ta mandando pa cu su maneho hiba, sindicato TOPA lo no sigui manda carta y haci yamada pa bolbe haya encuentro cu minister”. E sindicalista a sigui bisa cu e ta referi cu lo bay den accion e biaha aki y no drenta bek te ora cu e problema keda resolve. Lo duna minister e beneficio di duda, pa cu e comision di 3 dia, y a pidi tur hende pa bay den un ‘sistema di standby’.