• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Cu ley nobo riba bienestar di bestia, gobierno kier combati abuso extremo di mascota

ORANJESTAD - Recientemente oficina di e minister di naturalesa y medio ambiente Ursell Arends conhuntamente cu diferente fundacion di rescate y tambe KPA a ricibi informacion di un caso extremo di abuso di animal. E caso aki ta encera un cantidad di cacho di diferente rasa bou condicionnan hororoso y simplemente inaceptabel. Acomparti e imagennan di e cacho cu ta esun den condicion mas critico actualmente, despues di a wordo exponi na crueldad y abuso extremo di su mesun doño.  

ACTO DI CRUELDAD

E actonan aki di crueldad y abuso di animal no ta aceptabel, pero e ta sosode sigur tur dia den nos comunidad. “Pa es motibo nos ta sali pa dilanti como ministerio encarga cu e bienestar di nos animalnan, cu e caso aki como un ehempel pa informa y demostra na nos comunidad kico ta sosode den cura di cas cu nos mascotanan!” e ministerio a bisa e siman aki.  

PROBLEMA DI ANIMAL

E problema di animal aki na Aruba no ta solamente locual cu hopi hende ta pensa cu ta e cachonan ariba caya, pero e ta encera tambe e abuso y crueldad di animal cu hopi mascota ta sufri den cura di cas y tin biaha sin escape. “P’esey nos ta tuma e oportunidad aki pa menciona alabes cu e ministerio menciona ta cla cu nos maneho nobo pa nos animalnan”.  

MBBA

E Maneho Bienestar di Animal Aruba (MBAA) ta un maneho nobo cu ta enfoca ariba e causa primario di e problematicanan aki cu nos ta mirando den nos comunidad cu ta puramente abuso di nos animalnan. Nos ta bay den e direccion mas preventivo pa asina traha riba tur nivel pa preveni cu e problematica aki ta bay sigui escala fuera di nos control den futuro.  Un di parti nan importante di e maneho nobo ta cu lo bay traha ariba un ley (dierenwelzijn wet) nobo cu ta enfoca pa proteha nos animalnan. E ley aki lo atende cu tur e puntonan y problemanan cu nos ta mira actual den comunidad, na e forma corecto cu e reinforsacion debido y structura di parti di nos instancianan di autoridad. Cuminsando cu e caso aki. 

ASUBO DI ANIMAL

E ta sumamente lamentabel pa mira cu ainda den aña 2024, tin hende den nos comunidad cu ta pensa cu abuso di animal ta algo aceptabel. “Pero nos kier informa cu esaki no ta asina, cu e cambionan necesario y e sosten di nos stakeholders nos ta bay tuma accion riba diferente nivel pa asina mehora e bienestar di nos animalnan ariba nos isla”. 

NO KEDA KETO

Den mesun cuadro aki, e ministerio ta pidi esnan den nos comunidad pa por fabor no keda den silencio ora ta ripara cu abuso di animal ta sosode den bo bario. Meld esaki na bo polis di bario y splica e situacion concretamente pa asina casonan manera esaki por wordo preveni y asta procesa mas lihe cu ta posibel asina scapando bida di nos animalnan cu ta biba den sufrimento. No mester warda ora e situacion bira alarmante, mester actua na e prome señal cu algo ta robes. 

PROBLEMA DI TUR HENDE 

E problema aki di animal no ta di Gobierno, e no ta di polis e no ta di un fundacion, e problema aki ta di nos tur cu ta biba aki na Aruba y ta nos mes tin cu scoge pa haci un cambio. E ta cuminsa na abo como ciudadano pa ta alerta y demostra mas empatia pa asina salba nos animalnan cu tambe ta forma parti di nos sociedad.  

INFORMACION

Ministerio encarga cu dierenwelzijn lo bay publica mas informacion di nos maneho nobo pa e bienestar di nos animalnan. Pa cualkier tipo di informacion por fabor tuma contacto cu Centro Control di Cacho of CCC. Por haya nan ariba Facebook, of yama bo polis di bario pa raporta si ta ripara caso di abuso di animal. No keda den silencio y no warda te ora ta mucho lat pa raporta.