Hassell: “Ami no ta bezig ta haciendo mensenjacht na KIA"

SANTA PATIA – “Ami no ta bezig ta haciendo un mensenjacht riba ningun hende”. Directora di KIA den un entrevista exclusivo awe a splica NoticiaCla.com a reacciona riba e ‘walk out’ di awe mainta cu tabatin na e instituto penitenciaria. Segun Hassell, el a bin KIA pa maneha e instituto, y no persigui hende manera cu e sindicato TOPA su presidente Rene Bernabela ta pretende. Den un di su declaracionnan escaso cu e la duna, e la splica kico segun e, e situacion real ta na KIA.

REACCIONA PUBLICAMENTE

Hassell a splica cu e no a bin pafo publicamente pa reacciona riba tur e acusacionnan di sindicatonan (TOPA specificamente) ainda, y a sigura cu mayoria di e acusacionnan no ta basa riba berdad. “Mi a prefera di keda keto. Mi a acerca e minister concerni pa haya su aprobacion y reacciona riba tur e puntonan cu nan(e sindicato TOPA) a trece padilanti. Minister a duna Hassell permiso ‘verbal’ pa e reacciona, y como tal awe e la opta pa duna NoticiaCla.com e primicia y exclusividad den e storia di ‘welga di trahadonan’.

REUNION CU SINDICATO

Entre e puntonan cu Hassell a clarifica, ta e hecho cu segun TOPA, hopi ta wordo papia pero cu no mucho ta wordo haci. E la invita TOPA pa un reunion (hunto cu SEPPA), un biaha pa luna pa delibera riba nivel di directie-sindicato pa por yega na puntonan importante pa KIA. Durante e prome reunion a duna nan e concepto di e ‘ziektemelding procedures nobo’ cu ta bin na KIA. Pero e sindicato(nan) nunca mas a bin bek riba esaki.

CHAOS

Segun Hassell, e presidente di e sindicato TOPA (cu tin gran parti di e trahadonan di e instituto como miembro) no por pensa cu e ta bay sinta maneha KIA unda cu tin chaos. Y esey ta loke mi a haya ora cu mi a drenta KIA. E chaos ta consisti di e hecho cu hende tabata haci y deshaci manera nan tabata haya ta bon. Mes momento e la sigura cu no ta tur hende ta participa na e cosnan aki. “Mi sa cu un mayoria di personal tin nan mente positivamente poni pa e trabou” Hassell a bisa. E la sigui mustra cu ‘ohala minister di husticia (Arthur Dowers) por dune permiso pa e por mustra pueblo tur e diferente artefactonan cu ta drenta KIA cu ta prohibi (den KIA). “Mi no a wak ningun di e artefactonan aki kita cay fo’i shelo. Kier men nan mester a drenta paden via e porta principal”. Tabatin un argumento cu ta wordo uza, cu ta bisa cu nan ta ‘tira e artefactonan over di muraya di KIA. Y pesey mester tin hende paden cu ta controla constantemente pa e artefactonan aki no yega den man di e detenidonan.

MANEHO DI BERNABELA

Den cuadro di esaki, Hassell a manda puntra Bernabela, y a invite cu si acaso e no ta di acuerdo cu e maneho cu Hassell ta hibando, pa por garantisa no solamente seguridad di detenido, pero tambe seguridad di su mesun hendenan ‘cu e ta para grita pafo pa nan’, “por fabor sr Bernabela, skibi abo un maneho pami pa mi por wak si esey ta funciona den KIA”. E directora ta bisa cu ta facil pa para grita pafo. Ta facil pa sinta na mesa cu directie di KIA anto despues bay bisa cu a papia y a cansa di papia. “Pero mi no sa cu ken sr Bernabela a cansa di papia. Porta lo ta cu prensa?” Hassell ta finalisa bisando. Foto cortesia Bondia.com.