A.T.A: Por spera cifranan prometedor pa turismo den prome cuartaal di 2024

A.T.A: Por spera cifranan prometedor pa turismo den prome cuartaal di 2024

Posted on 03/28/2024 9:34 am AST | Updated on 03/28/2024 9:35 am AST

ORANJESTAD - Den e prome kwartaal di 2024, por spera cifranan prometedor y solido pa turismo como e pilar di entrada primordial y di suma importancia pa economía di Aruba. Asina e oficina di turismo di Aruba ATA ta raporta diahuebs. A.T.A. ta pone hopi enfasis riba e modelo di “High Value-Low Impact” cu ta para pa un balans entre cuater pilar cu ta e ‘Calidad di Bida di e residente’, ‘Calidad di Experiencia di e Bishitante’, Proteccion y Preservacion di Naturalesa & Medio Ambiente, y Contribucion Economico di e Sector Turistico’.

E meta ta pa sigui mantene esfuerzonan den linea segun e balans menciona, y logra aumenta e entrada proporcionalmente mas cu e volumen cu nos destinacion ta ricibi. Capacidad di carga tambe ta sigui ricibi atencion di parti di A.T.A. di diferente manera. 

VOLUMEN (“STAYOVER”) TA CRECE CU 20.7% DEN FEBRUARI 2024 COMPARA CU FEBRUARI 2023

 E demanda pa Aruba ta sigui ta sumamente fuerte! Y ta sigui surpasa expectativa. Conforme e demanda por mira tambe con aerolineanan a sigui expande capacidad Aruba y asina permitiendo nos captura e demanda halto. Te cu februari 2024, Aruba a ricibi un total di 241,343 bishitante “stayover”, esaki ta un crecemento di 20.7%, compara cu te cu februari 2023, unda a ricibi 199,942 bishitante “stayover”. 

ENTRADA (“TOURISM CREDITS”) 

Ta midi entrada, es decir e ‘calidad’ di bishitante’, na diferente manera. Entre otro locual bishitantenan ta dispuesto pa paga pa un anochi di estadia y entre otro pa medio di Tourism Credits registra pa Banco Central di Aruba. Den Q3 di 2023, Tourism Credits a aumenta cu 3% si compara e mesun periodo na 2022. Den e periodo di Q1 te cu Q3 di 2023, Tourism Credits a aumenta cu 13% si compara mesun periodo na 2022. Pronto A.T.A. lo ricibi estadistica defini pa por raporta ‘Tourism Credits’ di Q4 di 2023 compara cu Q4 di 2022. Den 2024 lo continua cu comparacion di cifranan di ‘Tourism Credit’ cu 2023. A base di analysis di A.T.A., por spera di sera 2023 cu un subida di 34% compara cu 2019. 

AVERAHE DI PATRONCHI DI GASTO PA CADA BISHITANTE DEN 2023

Visa Credit card su averahe den gasto pa cada cardholder a yega na un suma di $690 den 2023. Si mira entrada general di VISA por nota un crecemento di 13.8% compara cu aña 2022.

MERCADONAN Y CATEGORIANAN DI ACOMODACION

Den februari 2024, 81.3% di e total di e bishitantenan “stayover” pa Aruba a bishita for di Norte America, 5.1% a bishita for di Europa, 11.4% a bishita for di Latino America y 2.2% tawata procedente di otro partinan di mundo. Mirando e categorianan di acomodacion, den januari 2024 19.1% di bishitante a keda den hotelnan European Plan, 14.2% a keda den hotelnan All-Inclusive, 30.7% a keda den Timeshare y 36% a keda den otro tipo di acomodacion, conoci tambe como short-term vacation rentals (STVR). 

SHORT-TERM VACATION RENTALS 

A.T.A. tin acceso na un plataforma unda por wak e cantidad di cas, apartamento y villas cu ta wordo uza como vacation rentals como tambe e prijs averahe pa anochi, e ocupacion y un calculacion di e entrada cu esakinan ta genera. Den 2023, segun un estudio, A.T.A. a logra actualisa inventario di Condominiums existente y condominiums cu actualmente ta na caminda pa realisacion, y lista actualisa di lugar di estadia cu no ta un hotel pero cu si ta disponibel na e turista cu ta keda na Aruba pa un corto tempo.

Si compara februari 2024 cu februari 2023 por wak cu e ocupacion averahe di e acomodacionnan aki a subi cu 6.6 punto di porcentahe, for di un averahe di 71.6% na februari 2023 pa un averahe di 78.2% na februari 2024. 

Den caso di entrada, si compara febuari 2023 cu februari 2024 por wak cu e categoria a genera un crecemento den entrada di 16%. 

  • Banco Central ta mantene e tasa di reserva obligatorio na 22,0 porciento

    Banco Central ta mantene e tasa di reserva obligatorio na 22,0 porciento

    ORANJESTAD - Conforme e tarea di e Comite di Maneho Monetario (CMM) pa evalua, determina y duna transparencia riba e accionnan di maneho monetario di Banco Central di Aruba (BCA), BCA ta comunica lo siguiente. Durante e reunion di 26 di februari 2024, CMM a dicidi pa mantene e tasa di e reserva obligatorio na 22,0 porciento entrante 1 di maart 2024. Di e manera aki, e banconan comercial mester tene un balansa minimo na BCA cu ta igual na 22,0 porciento di e depositonan riba termino cortico di nan clientenan. E decision pa mantene e tasa di reserva obligatorio ta basa primordialmente riba e reservanan oficial cu ta relativamente serca di e limite minimo di e ARA, apesar cu tanto e reservanan oficial como e reservanan internacional a keda adecua y ta premira pa permanece asina durante 2024. Adicionalmente, likides excesivo di e sector bancario ta mustra un tendencia ascendente durante e ultimo lunanan. Finalmente ta considera prudente di mantene e reserva obligatorio na su nivel actual, mirando crecemento continuo di credito y su efecto potencial riba reservanan internacional. BCA ta sigui monitorea e desaroyo den e reservanan y likides excesivo y lo por dicidi di cambia e tasa di reserva obligatorio, si ta considera esaki necesario. 

  • Schlipken: Aruba ta spera 18 mil turista Brasilero den 2024

    Schlipken: Aruba ta spera 18 mil turista Brasilero den 2024

    SAO PAOLO – Aruba ta spera 18 mil turista Brasilero den 2024. Asina e director di turismo di ATA pa Latino Americano, Jordan Schlipken Croes a declara e siman aki na e portal PANROTAS, durante e evento WTM Latin America na Sao Paolo. Segun Croes, Brazil ta e di tres mercado Latino mas grandi pa Aruba, despues di Colombia y Argentina. Ta mustra cu na 2023 tabatin 14 mil bishitante di Brazil pa Aruba. Segun Croes, un di e motibonan di e cifranan grandi aki, ta e gastonan di e Brasileronan den e pais. Pa por yega e cifra di 18 mil Brasilero, Aruba tin 4 strategia principal pa e pais, fuera di e participacion na e bolsa di turismo Brasilero. Esaki ta e.o. incentivonan cu e operadornan y agente di biahe, ya cu 70% di Brasilero cu ta biaha pa Aruba ta cumpra nan pasashi via agentenan di biahe. 

  • Aeroliña Mericano a reduci prijs di pasashi pa Aruba cu 50% e siman aki!

    Aeroliña Mericano a reduci prijs di pasashi pa Aruba cu 50% e siman aki!

    BOSTON – E aeroliña Mericano conoci pa tarifa reduci, JetBlue a reduci su tarifa mas ainda, cu 50% pa biahero pa e.o. Aruba. Nan ta yame un deal special di 2 dia ‘Hit Refresh’, unda cu dentro di e dos dianan aki, e biaheronan mester cumpra e pasashi. Por usa e biahe entre 7 di mei pa 12 di juni y no tin asina yama ‘blackout dates’ osea dianan cu bo no por biaha. Pa Aruba e prijs a wordo reduci cu 50% di p.e $776 dollar te na $378 round trip. No ta algo inusual y ta algo cu nan ta haci frecuente, pero ta sigui interesante. Tur e pasashinan tin cu origina for di Boston.  

  • DEACI a otorga mas di 100 permiso pa negoshi nobo caba den 2024

    DEACI a otorga mas di 100 permiso pa negoshi nobo caba den 2024

    ORANJESTAD - Pa cuminsa un negoshi of haci cambio den e permiso pa negoshi segun ley, mester haci un peticion pa permiso di negoshi via e website di Departamento di Asuntonan Economico, Comercio y Industria (DEACI) y ta wordo otorga bou di responsabilidad di Minister di Asuntonan Economico.

  • Durante Seatrade 2024, islanan ABC a trata esfuersonan pa desaroyo regional

    Durante Seatrade 2024, islanan ABC a trata esfuersonan pa desaroyo regional

    ORANJESTAD - E presencia di Aruba na Seatrade Cruise Global 2024, ta semper un paso significante pa fortifica colaboracion den e industria crucero y promove iniciativanan turistico cu e isla tin pa ofrece.

  • CAFT: Adapta presupuesto 2024 pa inclui surplus di 200 miyon di 2023

    CAFT: Adapta presupuesto 2024 pa inclui surplus di 200 miyon di 2023

    ORANJESTAD - Den su conseho recien tocante di e di dos modificacion di presupuesto stipula 2023 (BW), e colegio di supervision financiero CAft a indica cu e ta anticipa resultadonan positivo inespera adicional. Cu e di tres raportahe di ehecucion (UR) ta confirma e imagen aki. CAft ta anticipa cu Aruba lo por cera e aña cu un surplus di financiamento di mas cu AWG 200 miyon pa e sector colectivo, loke ta 3 porciento di e producto nacional bruto (bbp). CAft ta conseha Aruba pa emplea e resultadonan positivo inespera pa amortisacion di debe, loke ta necesario pa baha e presion presupuestario di e gastonan di interes y pa crea espacio pa otro gastonan necesario. Enbista di e hecho cu e resultado lo sigui impacta na 2024, CAft ta pidi boso pa adapta e presupuesto na e dato aki den e prome BW 2024.

  • Powered by SETAR