Aruba Boutique & Art Hotel na Palm Beach ta habri su porta otro siman

Posted on 03/28/2024 9:05 am AST | Updated on 03/28/2024 9:11 am AST

ORANJESTAD – Diahuebs 14 di maart, Minister di Turismo y Salud Publico Sr. Dangui Oduber a ricibi un invitacion pa bishita Aruba Boutique and Art Hotel cu lo habri nan porta dia 1 di April 2024. Un boutique hotel nobo den curason di Palm Beach cu lo forma parti como miembro di e marca Best Western Signature Collection. 

Minister Oduber a ricibi un recorido unda e la keda encanta cu e concepto di boutique hotel di arte. Un concepto cu un experiencia cultural y unda e hotel lo ofrece servicio personalisa pa cada bishitante. E boutique hotel lo tin un galeria visual cu coleccionan impresionante di artesanonan local. For di e lobby te na e cuartonan di huesped, cada area di Aruba Boutique and Art Hotel ta decora cuidadosamente pa inspira y fascina. Esaki ta e prome di su clase na Aruba, no solamente e hotel lo tin un galeria di arte unda bishitantenan por cumpra arte, pero tambe lo experencia arte durante nan estadia completo. 

E boutique hotel aki ta sirbi como un ehempel di mercado “niche” cu ta enfoka ariba e bishitante cu ta busca un experiencia unico y intimo y cu ta amante di arte. Loke ta haci Aruba Boutique and Art Hotel diferente ta cu nan tin 38 camber, galeria di arte, piscina y jacuzzi cu luz, mini-mercado, concierge virtual, shuttle pa lama, ta inclui buffet pa desayuno, y un restaurant riba tereno habri pa desayuno, lunch y cena. Serca di e boutique hotel tin un restaurant nobo cu lo habri nan portanan pa nos localnan y turistanan cu yama  “Omundo” y lo comparti den su cumindanan un refleho di e compromiso di creatividad culinario y arte cu platonan conoci manera “street food”. 

  

  • Powered by SETAR