Segun RAIZ, Vrolijk a concede: Reunion pa ley matrimonio mesun sexo ta na mei

ORANJESTAD – Presidente di Parlamento Edgard Vrolijk a cumpli toch cu e peticion di partido RAIZ y a condece e reunion solicita riba tema di matrimonio di mesun sexo. Diaranson anochi laat, e partido RAIZ a confirma cu Vrolijk a confirma e fecha di 8 di mei 2024 unda Parlamento di Aruba lo haya oportunidad democratico pa vota riba e ley. No ta conoci si esey ta e motibo di e conferencia di prensa yama awe diaranson, pero ta mustra asina awor si. Esey ta nifica cu Vrolijk sea a baha cabez pa RAIZ, y concede e reunion toch, of cu mientrastanto e trabou di parlamentario Guedes a termina diripiente cu a pone cu awor si por yama e reunion. 

INCLUSIVIDAD

Segun e comunicado di RAIZ, nan ta splica cu den e ultimo tempo e compromiso di RAIZ pa democracia y inclusividad a bin ta resalta ora ta trata e topico di matrimonio entre pareha di mesun sexo. Como plataforma politico, RAIZ cu principionan di igualdad a nabega e proceso democratico cu un meta claro; trece e discusion di ley di matrimonio entre pareha di mesun sexo den centro di debate di Parlamento.

PETICION PA REUNION

Dia 22 di februari ultimo, parlamentarionan di RAIZ, Misha Raymond y Raymond Kamperveen a manda un carta na Presidente di Parlamento pa pidi pa un fecha. Diaranson 27 di maart 2024, Presidente di Parlamento di Aruba a confirma e fecha 8 di mei 2024 unda Parlamento lo ricibi e oportunidad democratico pa vota riba e ley. 

HOGE RAAD

RAIZ a sigura cu nan ta respeta estado di derecho y a laga espacio pa Hoge Raad tambe duna nan opinion. Pero e propio Hoge Raad tambe ta compronde cu ley di nos pais ta wordo traha pa representantenan di Pueblo. Esey ta trabou di Parlamento. RAIZ a duna democracia espacio y awor tin un fecha fiho pa atende cu e ley aki y tin tur speransa cu den un debate sano y democratico e balornan di igualdad y inclusividad lo sobresali.

“Ta importante pa remarca cu Hoge Raad a stipula e fecha di 31 di mei 2024 como e dia cu e decision final di casacion lo wordo anuncia. No obstante, RAIZ lo sigui defende y argumenta nos sosten pa e ley y su meta na un forma responsabel y cu respet pa otro. No tin obstaculonan cu lo cambia RAIZ su determinacion y compromiso pa cumpli cu proceduranan democratico pa derecho humano. RAIZ ta keda para pa respet mutuo y igualdad entre tur nos hendenan” e comunicado ta finalisa bisando.