Deadline a vence pa MEP: Diahuebs Raiz ta contesta!

ORANJESTAD – Deadline a pasa pa presidente di Parlamento (lesa: MEP). Awor palabra ta na fraccion di partido RAIZ. Diaranson 5’or di atardi, e ultimatum cu fraccion di partido RAIZ (lesa :Misha Raymond ) a pone pa presidente di Parlamento Edgard Vrolijk yama e reunion pa trata e ley di matrimonio di mesun sexo den Parlamento. E deadline a pasa, y nada no a sosode, manera cu por a spera. E prome pa reacciona, tabata lider di partido ACCION21, Miguel Mansur cu a pone riba su pagina di Facebook ‘Kico awor??” cu algun option. Mientrastanto atardi, e fraccion di RAIZ a yama un conferencia di prensa pa diahuebs 11’or di mainta cu e unico tema, ‘Matrimonio pa pareha di mesun sexo”. 

CONFERENCIA DI PRENSA

Pa diahuebs mainta 11’or, fraccion di RAIZ ta tene nan conferencia di prensa den Parlamento. Aki e partido (lesa: Misha Raymond), lo anuncia ki consecuencia esaki por tin. Mucho, hopi no ta spera, mirando e track record di e partido, unda cu den pasado caba a pone ultimatum, menasa pa despues hala atras. Hopi ta kere cu esaki ta bay ta e situacion un biaha mas. Hopi ta pensa cu Raymond lo doblega, un biaha mas cu consecuencia pa su votadornan. 

VROLIJK

Vrolijk a laga sa caba cu e no ta yama e reunion pasobra e no ta cla pa haci esey. Riba e pregunta di Noticiacla e siman aki, Vrolijk a contesta brevemente, ‘mi no tin comentario’, riba e pregunta si e ta bay yama e reunion. Ora cu a bira conoci cu e lo no yama reunion, lider di ACCION21 a pidi pa dialuna ultimo 10’or tene un reunion unda cu mester midi e sosten pa Vrolijk. E reunion ey tampoco no a tuma lugar. Y Mansur a opta pa tene un conferencia di prensa pa comparti su frustracion cu e situacion. Aki ta unda e la recorda cu pa awe diaranson, lo mester tabatin un reunion yama, manera cu Raymond a pidi (pa di dos biaha). 

OPCION

Mansur riba su pagina, a bisa cu entre e tres opcionan, e prome ta cu Raymond ta retira su sosten pa Vrolijk, cu ta nifica cu gobierno ta cay pa falta di sosten. E otro ta cu Vrolijk ta tuma su retiro pa salvaguardia e gabinete su existencia. Y finalmente, cu nada no ta sosode, osea cu un biaha mas Raiz ta doblega.