Buskeda pa persona den laman den haf na Baltimore ta continua despues cu brug a collapse

BALTIMORE – Den e haf di e ciudad Mericano Baltimore a reanuda e buskeda na 6 persona cu ta perdi despues di e drama di e brug cu a collapse un dia prome. Un barco di container a dal den un di e pilarnan di e brug, causando cu gran parti di e brug a collapse. Esnan ‘perdi’ ta trahadonan cu tabata trahando riba e brug ora cu esaki a collapse. Nan tabata trahando pa cera buraco riba e caminda riba e brug, ora cu e accidente a sosode. Polis ta asumi cu nan no ta na bida mas y no ta papiando di un accion di rescate sino di un operacion di recuperacion di curpa.  

KICO A PASA

Mientrastanto informacionan ta conoci riba kico a pasa. E barco tabatin como destinacion Sri Lanka. Diripiente tabatin un blackout abordo, cu a haci cu e barco di 9 aña no tabata manehable mas. E tripulantenan a purba haya e control di e barco, sin exito. Tabatin dos loods Mericano abordo tabe. Un di e loodsnan a pidi e tripulante pa hala e barco, pero no a logra. A logra pa sende un generador di emergencia, pero no a logra sende e motornan mas. E tripulantenan a manda señal di emergencia, esta un may day, cu den aviacion y navegacion ta un señal di alarma den situacionan di bida y morto.