Bernabela: Problemanan na KIA a ‘double up’

SAN NICOLAS – Un grupo di trahado di KIA awe mainta a pone trabou abou pa 2 ora, den forma di protesta pa haya atencion di minister di husticia Arthur Dowers. Segun e presidente di e sindicato TOPA (cu ta representa e grupo di trahadornan), esta Rene Bernabela, e ta pone Dowers responsabel si algo pasa. E problema cu nan tin, ta e maneho di e actual directora Trudy Hassell, y esun cu a pone eynan, Arthur Dowers. Segun Bernabela, ta acusa Hassell di un mensenjacht riba trahadonan pa e situacion di ‘ziektemelding’ enves di resolve otro problemanan mas importante.

DOUBLE UP

Den combersacion cu Bernabela awe mainta, e la splica NoticiaCla.com cu desde cu Hassell a bin na poder algun tempo pasa, e problemanan no a drecha. “Nan a double up!” Bernabela a bisa. Ora cu a kere cu a nombra un persona local cu lo por drecha e lugar, a resulta, -segun Bernabela-, cu e persona aki ta mas interesa den wak ken tur a meld ziek. Tin un persecucion di trahadonan formal den KIA, y esey no por sigui asina segun e sindicalista.

MENSENJACHT

Enbes di busca solucion pa e tantisimo problemanan interno cu tin, Hassell ta riba un mensenjacht, ‘buscando cada 5 minuut ken ta malo of no’. E sindicato tin problema cu e directora kier pa trahadonan cu meld ziek, haci esaki directamente serca e directora enbes di meld normal serca recurso humano.

TA BASTA

Sindicato a bisa awe pues, cu ‘ta basta’ y cu no ta soporta e situacion mas. A pone un accion cu e meta pa haya atencion di Dowers, ya cu tin un luna y mey cu e minister no a yama reunion manera planea. Ora cu NoticiaCla.com a tuma contacto cu e mandatario, e la informa cu e tabata na altura caba di e welga, y cu ya for di dialuna el a yama un reunion cu e sindicato pa awe mainta 11 or na su oficina. “E hecho cu e minister a yama e reunion, no ta nifica cu cos ta cool down” Bernabela a sigui bisa. Cos ta sigui ‘hot’ y ta determina despues di e reunion di awe mainta, si e accion ta sigui. Lo evalua e ‘draaiboek’, y wak si ta intensifica e accionnan pa 4 ora sea awe mes of mayan mainta.

LEAK DI INFORMACION

Bernabela tabatin problema tambe cu e informacion di accion a leak, for di dialuna mainta, ya cu e la ricibi un yamada di Dowers pa wak kico ta pasando. E leak ey lo a bin for di hendenan cu a reuni cu e sindicato. Como tal, tumando nota di e asunto aki, e lo cambia e forma di haci e comunicacion, pa evita esaki den futuro.