Grupo di ciudadano ta siña hypnotisa nan mes

ORANJESTAD - Un grupo di 16 persona a participa den e curso “Mastering the Art of Self Hypnosis” presenta door di Aruba Hypnosis Center NV.  Ora cu menciona hypnosis hopi biaha tin pensamento eroneo di kico hypnosis ta y durante di e curso e participantenan a comprende cu hypnosis ta un estado natural cu tur hende por siña y cu ta yuda haci cambio positivo den bo bida. 

Esunnan cu a participa na e curso a reacciona sumamente positivo. Un di e participantenan tabata Jacco Vroegop a comenta “e la yuda mi sinti mi calma y relaha.”

E cursistanan a siña entre otro kico ta hypnosis, con hypnosis ta sinti, kico ta e diferencia entre hypnosis y self-hypnosis, con pa uza palabranan correctamente, con pa comunica y influencia bo juinan positivamente, kico ta berdad di e storianan cu ta bay rond tocante di hypnosis, con pa haci self-hypnosis, con self-hypnosis por yuda bo haci cambio postivo den bo bida, con pa controla stress y mucho mas.  

Un di e participantenan, Gail Henriquez a comenta cu loke e la gusta mas di e curso ta e pasonan pa tuma pa ta exitoso, e manera cu e la wordo splica y e ehempelnan. E ta sinti cu un poco practica lo sigur yude den hopi cosnan den bida.

Hypnotismo probablemente ta mes bieu cu humanidad.  Storianan bieu y pensamento eroneo di hypnotismo a wordo reemplasa pa aplicacionnan cientifico proba. Awendia hypnotismo ta wordo uza den diferente ramo incluyendo: medicina, odontologia, husticia, deporte profesional y educacion.  

Otro persona cu tambe a participa ta Selimah Maduro Halabi, pe, e curso tabata hopi facil pa sigi. Tambe e la expresa cu e la gusta vooral e participacion interactivo.

E curso di dos anochi a wordo presenta door di Eddy Oduber, director di Aruba Hypnosis Center, cu desde 2006 ta practica hypnotherapia na Aruba. Eddy ta un Instructor certifica door di e organisacionnan di hypnosis mas grandi y mas prestigioso na mundo.

E curso di Self-Hypnosis ta wordo presenta diferente biaha pa Aña y ta parti di e meta di Aruba Hypnosis Center pa kita e mystisimo y pensamentonan eroneo tocante di hypnosis.  Tambe pa permiti tur hende comprende y realisa cu e uzo corecto di hypnosis por ta un herment cu por haci cambionan masha grandi y positivo den bo bida. Particularmente e por yuda baha peso, stop di huma, controla stress y cambia habitonan cu ta limita nos.