Acuerdo interno riba International Health Regulation

 ORANJESTAD – Un encuentro historico a tuma luga ayera entre e Ministernan encarga cu Salud di Aruba, Corsou y Hulanda. Pa prome biaha den historia di Reino cu Mininsternan di Salud di Reino ta reuni. E mandatarionan a participa den transcurso di dialuna den un Consulta Ministerial riba e topico di ‘Internationale Gezondheidsregeling’ of ‘International Health Regulation’. E resultado tabata firmamento di un acuerdo interno na final di e prome dia di e ‘Health Care Conference Aruba’ (HCCA).E reunion importante aki tabata entre Minister Hulandes Edith Schippers hunto cu su delegacion cu a consisti di ehecutivo di Salubridad Publico y su Ministerio. Di parti di Corsou tabat’ey Minister Ben Whiteman compana pa dr. Gersje Rodriguez-Pereira, Inspector di Salubridad Publico di nos isla ruman. Representando Aruba, Minister Alex Schwengle a lidera un delegacion cu a inclui miembronan di su Ministerio.St. Maarten tambe tabata invita pa forma parti di e Consulta Ministerial, sin embargo e Minister President a excusa pa medio di un carta den cual a hustifica na ausencia pa motibo di, entre otro, agendanan conflictivo. Asina mes, un delegacion di e pais den Reino cu ta participando den e HCCA, a presencia e encuentro. E tabata lidera pa dr. Earl Best, Inspector General di St. Maarten y ehecutivonan di Departamento y Inspeccion di Salubridad Publico.Ta trata di un acuerdo importante ya cu e ‘International Health Regulation’ (IHR) ta papia di entre otro e standard y reglanan cu mester cumpli cu ne pa ta debidamente prepara pa, por ehempel, malesanan contagioso. Manera ta conoci, y a ripara den e caso di Chikungunya, nos region ta particularmente vulnerabel pa su industria turistico y comercio, entre otro.“Mi ta hopi orguyoso cu nos a yega na acuerdo pa implementa e IHR y reenforsa otro hunto pa cumpli cu e reto di malesanan contagioso y otro retonan cu nos den cuido medico,” asina Minister Hulandes di Salud Publico, Edith Schippers a duna di conoce net prome di a firma e documento.Di su banda, e homologo di Corsou, Minister Ben Whiteman a indica cu e ta kere cu esaki ta un ‘milestone’. “E lucha conta malesanan infeccioso ta birando mas ‘intense’. Esaki ta un asunto hopi importante y mi ta contento di wak cu nos den Reino Hulandes ta avansando.”Pa finalisa, anfitrion di e conferencia, Minister di Salud Publico di Aruba, Alex Schwengle a expresa su satisfaccion di por a sinta, papia y yega na un acuerdo. “Haci e islanan consciente di e peligernan di nos limitacionnan ta cuminsa cu e realisacion cu nos no por haci tur cos riba nos mes.”E firma di e acuerdo aki, cu a tuma luga den edificio di ‘Cocolishi’, ta djis un di dos cu a keda acorda entre e Ministernan, pero e di dos tin mester di mas deliberacion; como tal, a acorda cu lo concretiza tur cos prome cu dia 1 di juli.