Huez ta dicta sentencia riba referendum di RIU hotel diahuebs

ORANJESTAD – Huez lo dicidi pa diahuebs awor, si ta suspende e referendum pa sindicato den RIU programa pa diabierna awor. RIU Hotel a hiba tanto mediado di gobierno (Anselmo Pontilius) como sindicato FTA corte, dialuna merdia, pa purba para e referendum. Segun RIU, e forma cu kier trece e referendum, no ta corecto, y segun sindicato FTA, RIU tin miedo pa sindicato drenta e hotel. Mediado di gobierno ta simplemente scucha y implementa loke tin cu implementa.

RIU

Abogadonan di RIU, Pieters y Wix, a argumenta cu nan kier pa huez suspende e referendum pendiente e bodem procedure cu ta andando. E problema segun abogado Wix a splica NoticiaCla.com, no ta pa sindicato drenta RIU, sino e forma cu nan kier hacie. “Tin tres peticion pa tres diferente referendum den e mesun hotel”, Wix a cuminsa bisa. E ta un discusion cu ta tumando lugar pa hopi aña pa e tres partidonan riba e interpretacion di e ley di referendum. “Nos kier pa huez tuma un decision definitivo, riba e discusion con e ley mester wordo interpreta riba e punto aki”. Segun Wix, ningun momento RIU tin problema pa tin sindicato den hotel. “Hende tin e derecho pa sindicalista nan mes. Loke ta dificil pa e compania, ta e separacion di e sindicatonan. Pa un doño di hotel ta dificil negosha cu 4 diferente sindicato pa 4 posibel CAO. E la sosode un biaha na Hyatt, riba e situacion aki pero no a logra.

MEDIADO DI GOBIERNO

Segun e mediado di gobierno Anselmo Pontilius, no ta prome biaha cu e tipo di casonan aki ta bin dilanti. E pregunta segun Pontilius, ta cu si un referendum por wordo teni pa un categoria den un empresa si of no. E la sosode caba den pasado segun e mediado. Segun Pontilius si huez dicta contra e referendum, e lo tin cu cancela e referendum, conforme cu e sentencia di huez. E ta premira si, y ta spera si cu e no sosode, cu por tin problema laboral. Mas specifico, ora cu e hotel bolbe habri, por spera problema na pia di trabou. Y e ora e mediado tin cu (riba orden di gobierno) yama un periodo di ‘fria cabez’ pa asina haya partidonan bek na mesa of, den e caso aki, na trabou.