Hoo: Como hefe interino nobo di Guarda Nos Costa e kier e.o drecha e imagen

ORANJESTAD – Actual director interino di departamento di inmigracion Andrew Hoo a confirma diabierna pa Noticiacla cu enberdad diahuebs e la keda apunta temporalmente como hefe di departamento di Guarda Nos Costa, pues awor e tin dos departamento cu ta cay bou di dje. Segun Hoo, no ta algo cu e la solicita pe, sino mas bien ta algo cu a wordo atendi algun tempo atras caba y mirando e embergadura y tipo di funcion, unda cu imigracion tin un vinculo directo cu Guarda Nos Costa, a pensa cu esaki tabata paso logico pa pone esaki ‘bou di un dak’. “E ta algo pa tene e barco cu timon”. Mientras cu e funcion ta uno temporal, e ta pa ‘tempo indifini’. 

MANEHA DOS LUGAR DIFERENTE

Awor cu e tin dos funcion, e tin cu mobilisa di un pa otro lugar, mirando cu e centro di operacion di e dos funcionan no ta na e mesun lugar. E importante pa Hoo, ta pa tin contacto cercano cu e personal, cu e ta considera esencial. “Mi ta bay mas hopi cu ta posibel eynan. Pero mi presencia fisicamente no ta necesario 8 ora pa dia eynan. As long cu mi tin nauw contact y duidelijke afspraken traha, e ta funciona” Hoo a sigui bisa. 

MANEHO 

Hoo a splica tambe cu ningun orden a bin di ariba specificamente con e mester maneha e lugar, y of pa haci cambia. “E visie mes cu ami tin ta pa cuminsa mehora e situacion eynan y kita e stigmatism cu e lugar ta draai roekeloos, sin hefe”. Tambe e kier enfoca riba proceso, pone cos riba papel, e maneho, e taak omschrijving, concretisa esaki y inverti den e personal. Percura pa nan ta educa, brush up riba LTU, duna nan nan instrumento pa por traha, y regla e parti huridico ora cu nan actua. “Nan mester ta bon bijgeschoold den nan LTU (Landsverordening Toelating & Uitzetting). 

INTERINO

Mientras cu Hoo ta awor encarga tambe, temporalmente, cu departamento di Guarda Nos Costa, su funcion actual na inmigracion di Aruba tambe ta ‘interino’. Riba esaki sinembargo, contestando pregunta di noticiacla, Hoo a splica cu ora cu e la wordo apunta na inmigracion, e tabata den un forma temporal, pendiente e screening di e.o. Veiligheids Dienst Aruba (VDA). Mientrastanto e screening a sali positivo pa Hoo, pues awor ta wardando e landsbesluit pa nombra Hoo como director di e departamento, cu titulo completo, envez di ta aworaki, interino. 

TRAYECTORIA

Hoo su trayectoria ta bin for di Cuerpo Policial unda cu e la fungi como e hefe maximo, esta Korps Chef, y tambe anteriormente encarga cu seguridad hotelero di un hotel grandi local. Despues awor a nombre na inmigracion cual funcion e ta maneha awor.