Campaña pa ‘distingui’ cu ‘nos definitivamente no ta nan’..

Cu eleccion un tiki mas cu un aña na bista, partidonan politico na Aruba a cuminsa trata di profila nan mes mas tanto cu ta posibel como "e diferencia" den e campaña benidero. Esaki tambe ta conta pa e dos partidonan den coalicion MEP y RAIZ. Realidad ta cu masha tempo ‘campaña a cuminsa’ pa algun partido, y otronan nunca a stop di ‘campaña. Pero señalnan e siman aki un biaha mas tabata mas y mas bisto di esaki.  Tin señalnan di "cracks" den e coalicion actual entre MEP cu RAIZ. Muestra di esaki ta e.o. e actual tension entre e dos partidonan riba e tema controversial di matrimonio di mesun sexo. Mientras cu MEP defacto a laga e decision tocante e tema aki den man di Hoge Raad, cu fin di mei mester bin cu nan sentencia riba e tema,  Raiz ta purba di ‘forsa’ un tratamento den Parlamento di e propuesta di ley aki ainda prome cu e sentencia aki bira conoci. Un tiki straño pasobra implicitamente Raiz tambe a bai di acuerdo pa apela e sentencia di Corte Comun di Aruba y Antiyas den cua e matrimonio di mesun sexo a wordo aproba. Pero asina mes e fraccion di Raiz den Parlamento (lesa: Misha Raymond) a solicita presidente di Parlamento pa tene un reunion pa trata e propuesta di ley pronto. E presidente a nenga e solicitud di tene e reunion den 30 dia argumentando cu tin proceso di consulta den pueblo andando y cu e lo warda e rapport di tal consulta prome cu e jama tal reunion. Raiz no a keda contento y e tension a subi mas ainda. Awor mester corda cu Raiz tin un record si di ta hunga hopi biaha e "tiger di papel" es decir gruña hopi pero no morde. Esei a pasa entre otro cu e contrato di LNG cu no a wordo "publica". Tambe ta conoci cu Raiz su color oficial cu oficialmente ta shinishi, mas y mas a haya tinte di geel y unda cu hende por puntra nan mes si di berdad Raiz por sigui bisa "nos no ta nan". Realisando esei, Raiz tin necesidad pa tin un of mas issues di conflicto den e campaña benidero pa por distingui su mes for di MEP pa hende no por bisa cu "un voto pa Raiz ta un voto pa MEP". Hecho ta cu ni Raiz ni MEP tin logronan cu por wordo considera realmente como grandi riba nan cuenta pa e gobernacion actual. E siman aki e coalicion ta broma riba e publicacionan di varios agencia di rating financiero, siendo cu grandi parti di esaki ta danki na e ‘sosten di Hulanda’. Y e realidad ta cu turismo ta desaroyando apesar di MEP y otro partidonan na mando pa añanan caba. Despues di pandemia no tin nada pa gaba cune. Pues tanto MEP como Raiz mester di un "postema" pa por kibra e coalicion y drenta campaña, puntando dede riba otro manera MEP a haci cu POR den e gobierno anterior y mustrando ‘cu tin un motibo solido pa yama eleccion mas trempan’.