Wix: Nunca tabata envolvi den deal di Radisson y RIU Hotel

ORANJESTAD – “Ningun rato so, ami of un hende den mi oficina, a yega coi informacion di Aruba Growth Fund (AGF), pasa pa RIU of pa cualkier otro hende”. Asina abogado local pa RIU hotel, Ronny Wix a sigura NoticiaCla.com dialuna merdia. Esaki a base di cu den corte mas tempran e mainta ey, abogadonan den e caso entre AGF y Carlson Group a insinua cu e abogado local di RIU lo a uza e informacion pa sigura e deal entre RIU y Carlson Group. E la sigura cu e no tabata envolvi den e negoshacionnan entre e dos companianan menciona.

DUE DILIGENCE

Wix a splica cu enberdad e la haya un assignment di Aruba Growth Fund, pa haci un due diligence den Radisson. “Mi a haci esey pa nan y mi a rond e af pa nan manera cu nos a palabra” Wix a bisa. Pero e no a haci (lesa mas ariba) loke e la wordo tilda di dje. “Dia cu mi tin gana pa nan kita mi como abogado, lo mi haci esey” Wix a bisa. E ta considera e acusacion ey baho, y algo di desesperacion di esnan cu a hacie. “Mi no sa ken a haciele pero mi no ta acepta e coi kensnan ey. Tipo di alegacionan ey”.

ENVOLVI DEN BENTA?

E la sigui bisa cu nan bufete no tabatin nada di haber cu e proceso di compra of benta di Radisson door di RIU. “Nos no tabata sa mes cu nan tabata papiando cu otro. Es mas; nos no sa nada di e benta di Aruba Growth Fund tampoco. Nos a haci un taak specifiek pa nan cu ta e due diligence y nunca nos no tabata envolvi den e negoshacionnan di compra y benta” Wix a bisa.

BIDDING

Den e proceso di bidding sinembargo pa bira cumprado di Raddison, Wix ta admiti cu e la representa un otro grupo. “Nos no a representa Aruba Growth Fund. Nos a representa un otro grupo, tambe di Spaña, y despues cu Aruba Growth Fund, nan a bin serca nos pidi nos pa haci e due diligence. That was it” Wix a bisa. Riba pregunta cu si Wix tabata posiblemente e abogado di RIU cu a finalisa e deal pa e compania, Wix a nenga. “Ami tabata sa ora cu tur cos a wordo firma caba, mescos cu tur otro hende na Aruba. Ningun hende tabata sa di e deal, te ora cu e tabata un feit” Wix a finalisa bisando.