Veterinarionan ta desmenti informe cu tin brote di distemper na Aruba

ORANJESTAD – Un nota di voz (voice note) cu ta pasando rond riba rednan social di Aruba, tin e asosacion di Veterinario di Aruba preocupa. E nota di voz, ta di un persona papiando na papiamento, indicando cu tin e malesa di ‘distemper’, un malesa serio di cacho andando na Aruba, y cu e tin e supuesto solucion den forma di un pilder cu e la haya di Panama. E persona ta haci mencion cu lo tin mas cu 80 cacho morto caba entre Lago Heights, Mabon, Savaneta y Santa Cruz. Segun veterinario Natalie Booi, for di ayera nan a tuma nota di e nota aki, y kier a coregi e informacion aki. 

DOKTER DI CACHO

E persona cu ta papia papiamento, ta indica cu e ta un supuesto dokter di cacho, bisando cu tin un brote hopi serio di un malesa distemper y cu hopi cacho na Aruba lo a muri caba. “E ta bisa hasta cu su mesun cachonan a muri”, Booi ta sigui bisa. Den e mesun mensahe di e homber, e ta haci propaganda cu e lo tin un pilder magico cu e ta bendiendo pa 50 florin, cu esaki ta cura e malesa. “Ora cu nos a scucha e mensahe aki, nos a bira preocupa, pasobra e noticia no solamente ta un completo mentira, pasobra nos no tin distemper actualmente na Aruba” Booi a sigura Noticiacla. Den pasado tabatin un brote berdad basta fuerte. Pero segun Booi, esaki ta algo cu di biaha ta wordo ataca, via di DVG y departamento di salud pa informa di e situacion aki. “Ta nan ta esun cu lo haya e prome casonan y nan ta esunan cu tin e expertisio si enberdad ta trata di distemper”. Segun Booi, e veterinarionan tambe tin test pa wak si enberdad ta trata di distemper, y si tin caso sospechoso mes di distemper, ta haci e test manera esun di corona y den algun minuut ta haya sa si enberdad ta trata di distemper. “Asina cu tin un caso positivo, nos lo alarma tur otro clinica, y avisa DVG pa bin cu un comunicado pa alarma e pueblo. 

SEMPER MESTER TA ALERTA

Segun Booi, esaki no ta kita afo cu semper bo mester ta alerta pasobra di fuentenan y coleganan di Venezuela p.e. tin un brote basta fuerte andando na Venezuela. Nos suerte ta cu e frontera aereo cu Venezuela ta cera aworaki, cu ta haci mas dificil pa hende yega Aruba. “Pero nos sa si cu e frontera (maritimo y aereo entre Venezuela) cu Corsou si ta habri, y nos sa tambe cu tin mascotanan cu ta bay di Venezuela di Miami pa Corsou y asina nan por yega Aruba. Dus nos como grupo di veterinario ta hopi alarma caba pasobra nos sa cu e brote ta un cuestion di tempo” Booi a sigui bisa. E ta spera cu e brote no yega por lo pronto. E ta un combersacion cu tin entre e grupo di veterinario cu nan sa cu e brote lo bin. “Pero actualmente ningun di e clinicanan veterinario, niun caminda na Aruba nos no a haya un caso sospechoso, y e otro cos ta cu no ta existi un pilder pa combati distemper. Distemper ta un virus, di cual e nomber oficial ta K9 Distemper virus, na spaño e ta moquio. E ta un virus mescos cu griep, corona, rabbies, y no ta existi un tratamento contra di dje. Unico cos cu bo por haci contra Distemper, ta pa preveni, vacuna bo cacho, percura pa e tin e bon vacuna. Esaki no kier men cu e cacho no por haya e distemper, sino mas bien cu su sistema imunologico ta cla pa bringa e virus aki. NOTA: E potret cu ta acompaña e articulo ta uno generico y di archivo y no necesariamente ta un caso actual di cacho cu tin distemper na Aruba.