Na Corsou, fiscal a demanda 16 aña prizon pa mama y 6 aña pa yu cu a mata homber y bent’e na Playa Canoa

WILLEMSTAD  Ayera fiskal a hasi demanda di 16 aña pa Yvolaine J. i 6 aña pa su yu hòmber Gabrielo  J. Ámbos akusá di ta responsabel pa morto di S. Domitilia dia 18 di yüni 2023. Algun persona ku tabata den área di Playa Canoa e dia ei, a tuma nota di un kurpa sin bida ku tabata drif den awa. Na momento ku nan a yama polis i a saka e kurpa for di awa a resultá ku tabata di e hòmber Domitilia. Polis a kuminsá ku investigashonnan i entre otro a bai wak den kámaranan di e negoshinan ku ta keda den área di Playa Canoa. Nan a mira riba e kámaranan un vèn blanku i un Toyota Yaris kolo di oro, ku a kore yega na  e sitio i despues di 20 minüt e dos vehíkulonan a sali bek.

Polis a haña e vèn bandoná na altura di Mirador na Hato i a bin haña rastronan di dede den e vèn  ku a keda investigá i a resultá di tabata di Gabrielo.  E investigashon a sigui i  polis a logra detené Yvolaine . Durante su detenshon el a ninga di sa algu di e asesinato. El a bisa ku e dia ei, el a  sali ku su yu nan bai hasi kompra, kobra un par di hende sèn di kolonia ku e ta bende, pero ora el a regresá kas e no a haña e viktima. Ta despues el a tende ku e kurpa ku nan a haña ta drif tabata di su pareha.

Pero despues ku polis a konfront’é ku e loke nan a haña i tambe imágennan di kámara, e akusado a atmití ku e ta esun ku a asesiná  e viktima. El a bisa ku e tabata viktima di maltrato i tambe violashon seksual. Segun e akusado, tur dia e hòmber tabata bin ku amigunan mar’e  i viol’é. E hòmber tabata bend’e mariwana promé i despues el a kue hasié su muhé. E dia enkuestion , e kier a mustra e hòmber kon ta sinti di ta mara i violá. El a sedusié, mara su man pa hasi manera ta un spèl e ta hunga kuné  i kier a hinka un “dildo” den su atras. E hòmber a bira agresivo i a  kue un kuchú pe. El a trata na kita e kuchu, pero e hòmber a keda bringa kuné. Ora el a logra kita e kuchú, el a kue esaki i hinka e hòmber kuné. E akusado a bisa ku no tabata su intenshon pa mata e hòmber.  E kier a bai hospital kuné, pero na kaminda el a muri. Su yu kier a yama polis, pero el a ninga. Nan a kore bai playa Canoa i a deshasí di e kurpa. Segun fiskal, polis a skucha e yu muhé menor ku a konta ku e dia ei, el a mira su mama i su ruman hòmber tabata papia poko poko. Despues su mama a bis’e pa nan ban den outo. Su mama a drenta outo di su ruman i e ruman a bai ku  ku e vèn. Den outo su mama a bis’e ku su ruman a choka Domitilia  i ku e tin hopi nèrvio. Nan a kore bai playa Canoa i su mama a baha bai serka su ruman. El a mira ku su mama a benta un tas ku paña na laman, despues a drenta outo bek . Nan a kore bai mirador i pone e vèn einan.  Su ruman a bin den outo i su mama a puntra su ruman si el a skòp e tambe  i ku e ta kere ku e lo  rebibá den awa. E ruman a bis’e ku e sistema ku el a dal e kuchu, e no por lanta nunka mas.  Pa fiskal esaki ta un testigu klave i no ta duda den su deklarashonnan, banda di esaki fiskal a tene kuenta ku e imágennan di kámara. Segun fiskal, tin diferente senario, ku por a tuma lugá. Fiskal ta konsiderá e asesinato aki unu kruel, kaminda a mata un hòmber i den pleno dia a bai tir’e na laman. Despues ámbos akusado a sigui biba normal,mmanera nada ta pasando. Mirando  tur esakinan fiskal  ta yega na un demanda di 16 aña pa Yvolaine i 6 aña pa Gabrielo.  Daño material di 7500 florin pa e yu muhé di e viktima  i tambe 11 800 florin pa e otro yu, mas 18  mil florin pa ruman muhé di e viktima. Wes lo tuma desishon dia 8 di aprel binidero. NOTA: Texto ta scirbi den Papiamento fonetico di Corsou.