Wever Croes: Ta di acuerdo cu lema ‘No more hotels’ y lo sigui negosha pa menos camber

ORANJESTAD - Prome Minister Evelyn Wever-Croes diaranson a informa cu e ta ful di acuerdo cu e lema di "No More Hotels" cu algun gremio y instancia no gubernamental ta usando den nan campaña ultimamente, y cu e lo sigui traha na mantene Aruba, como e destinacion turistico mas gusta pa su bishitantenan. Y cu esaki e ta sigura cu lo sigui negosha pa reduci cambernan di hotel na Aruba. 

E ta indica cu na momento cu Gabinete Wever-Croes a drenta gobierno, a encontra compromisonan haci pa e gobierno anterior, pa construccion di un total di 7000 camber di hotel nobo na Aruba. Mirando cu e cantidad aki ta hopi halto, y pais Aruba no lo por carge, a cuminsa cu negociacionnan pa purba na reduci esaki. 

Durante e negociacionnan, algun hotel a bay di acuerdo pero otronan a nenga, di cual ainda e casonan ey ta den corte. Actualmente, gobierno a logra reduci e cantidad na 2000 camber, y lo sigui cu negociacionan pa baha esaki ainda mas. 

Prome Minister a expresa di ta ful di acuerdo cu e lema di "No More Hotels", y lo sigui traha na mantene Aruba, como e destinacion turistico mas gusta pa su bishitantenan.