Pasahero riba Delta ayera ta conta: "A tende un boem ora cu a lanta buelo"

ORANJESTAD – “Un pasahero di buelo DL 581 di Delta Airlines  a tende un boom duro ora cu e avion a lanta buelo pa prome biaha for di Aruba diamars atard” ta loke cu prensa Mericano ta bisa di un pasahero cu a conta di su odisea. E noticia di e incidente di ayera ora cu capitan di e avion tipo Boeing 737-900 a bati alarma grandi despues di lanta buelo for di Aruba rumbo pa Atlanta. Un di e motornan a daña y lo a rementa internamente causando e problema cu e mester a bati alarma pa aterisa di emergencia bek na Aruba. E avion cu 168 pasahero, dos piloto y 4 tripulante di cabina, mientrastanto a aterisa sin problema, pero no por a sigui despues y a pasa anochi na Aruba. 

E LOKE A PASA

“ Buelo DL 581 di Delta di Aruba pa Atlanta a experencia un problema mecanico net despues di ‘take off’, un vocero di e aeroliña a declara na prensa Mericano. “E la aterisa sano y salvo y a bolbe e gate sin probnlema” e vocero a sigui bisa. “Ekiponan di Delta ta trahando pa percura pa su pasaheronan yega nan destinacion final mas lihe cu ta posibel y sigur y nos ta pidi disculpa pa e retraso den buelo” e vocero a sigui bisa. E pasaheronan mester a keda un anochi mas na Aruba riba cuenta di Delta. 

E PASAHERONAN

Mientrastanto, pasaheronan mes a conta di nan experiencia. Un pasahero a bisa di a tende un boem duro despues cu e avion a lanta buelo. E la conta cu e avion mester a circula 4 biaha rond di Aruba prome cu e avion por a aterisa. Un pasahero a conta cu un di e motornan ‘a rementa’ ora cu e avion tabata lanta buelo, y cu e avion a circula 4 biaha y a baha di emergencia. Un pasahero a bisa cu Delta lo a cubri hotel y cuminda durante e buelo. “E ta mustra cu e (incidente) a sosode net ora cu e tren di aterisahe a lanta. Mi a kere prome cu un parti di e tren a pega y a lanta laat” un otro pasahero a sigui bisa. 

E CAPITAN

E capitan, segun informacion di e pasaheronan, a bisa cu e capitan a usa e sistema di comunicacion abordo pa informa cu e motor banda robez di e avion tabata na candelka pero cu a sigura tur hende cu tur cos tabata bou di control. Ademas cu mester a haci algun checkeo prome cu e por a aterisa e avion. 

MAL NOTICIA PA BOEING

Esaki ta un incidente y mal noticia mas pa e fabricante di e avion, BOEING cu tin hopi reto e aña aki. Diamars ainda e hefe di e agencia federal di avion Mericano FAA a anuncia cu BOEING mester aumenta su cultura di seguridad y resolve cualkier problema di calidad prome cu e agencia por aproba un aumento den produccion di e tipo di avion 737 MAX. Na januari ultimo FAA a tuma un medida extraordinario pa informa BOEING cu e lo no autorisa e compania pa aumenta produccion di e 737 MAX, despues di un emergencia den pleno buelo di Alaska Airlines mas prome e luna ey.