Kan riba Radisson: “Duna nos e yabi y boso ta haya e placa”

ORANJESTAD – “Nos kier e yabi fin di luna y nan ta haya e placa. It’s that simple”. Asina e partner director di Aruba Growth Fund, (AGF) Rene Kan a bisa NoticiaCla.com awe merdia despues di e caso cu nan a cuminsa den corte contra Carlson Group. Nan no kier tende di daño y perhuicio en caso nan no haya e benta mas. E intencion awe tabata pa pidi huez para e benta y pone nan sinta na mesa bek. Segun Kan, e placa tey, tur cos ta cla y nan mester djis rond af e asunto. Nada mas ta valido pa nan.

ATENCION

E caso mes a hala hopi atencion, no solamente di prensa, sino tambe den e mundo di abogacia. Varios abogado a opta pa ta presente djis pa ‘experencia’ e caso cu nan a considera ‘interesante’. “Ami kier a maak esaki mee. E ta algo interesante”, Jonathan Steward a bisa. Su colega Darin Crouch tambe tabata ‘toehoorder, y por a mira mas abogado interesa den e sala di corte.

TRAYECTORIA AGF

Abogado pa AGF, sr vd Heuvel a repasa rapidamente e trayectoria cu a cana, te unda cu nan a yega siman pasa y confronta un sorpresa no agradabel. Y sigur no si no tabatin ‘closing issues’, sino solamente un lista limita di ‘unresolved issues’. “Pero e issuenan no tabata un ‘deal breaker’, vd Heuvel a bisa. Cu un postura calmo y sigur di su mes, vd Heuvel a sigui relata e situacion. Hopi fecha a bin dilanti, di cual porta esun mas importante tabata 18 di mei, riba cual mester a reuni pa keda cla cu tur ‘unsolved issues’. Pero pa nan sorpresa, e partido su abogado ‘no tabata prepara’ y no tabata sa hopi di e caso. A dicidi cu ta papia atrobe ‘mayan’. Solamente, cu mayan no a yega nunca. Diripiente dia 21 di mei, a bin un mail cu un lista di ‘unresolved issues’ di e persona encarga cu e negoshacion, Dean Brunner. Pero for di e tempo ey, te cu dia 26 di mei, no a sosode nada mas (posiblemente debi cu tabata memorial weekend). Y diripiente dia 26 di mei, Brunner a manda un mail indicando cu ‘mi ta para esaki. E negoshacionnan ta cana cu problema’. Pero segun abogado di AGF, ningun caminda den ningun di e cartanan (entre partidonan) e periodo ey, a bisa un palabra di RIU y of e benta di esey. “Esey no ta husto”.

TARDANSA DELIBERA

De hecho, e abogado ta kere cu a ‘tarda e proceso deliberadamente’ pa por keda cla cu e deal cu RIU. Y ainda, e abogado a cita algun email, pa mustra cu no tabatin ningun indicacion cu cos tabata malo. “Cos ta mustra bon. Carlson Group a bay di acuerdo cu e suma”, vd Heuvel a sigui bisa. Tur ta indicacionnan cu no tabatin ningun problema. A compronde e ora cu ,-mientras cu tabata ‘negosha cu AGF’, Carlson Group tabata firmando cu RIU. “E ta un hecho. E ta inaceptabel sr huez’, e abogado a sigui bisa. Loke a sigui, a hala hopi atencion.

REPLIEK Den e parti di repliek (reaccion riba defensa di partido opuesto), abogado vd Heuvel, a mustra cu nan ta wordo ‘trata inhustamente’ door di e partido contrario. “Tabata un deal hopi facil, pa negosha cu RIU den apenas 8 dia aparentemente. “. Segun vd Heuvel, nan tabatin un splicacion di con tur cos por tabata asina lihe. Nan tabatin e presentimento cu e abogado , - cu AGF a pidi pa haci e asina yama ‘due diligence’ pa nan-, ta e abogado pa RIU hotel na Aruba tambe, esta Ronny Wix. A mustra riba e posibilidad cu e abogado lo tabatin conocemento di tur e informacion adkeri, y asina lo a yuda cu e deal di RIU. Y pesey e deal cu RIU tabata asina lihe, pasobra e abogado di RIU tabatin tur e informacion. Nan (AGF) a negosha 9 luna, mientras cu e deal cu RIU a dura apenas 8 dia. Un deal cu abogado di Carlson Group despues a confirma cu a keda cla dia 22 di mei ultimo. Ocho dia despues cu RIU a bati riba porta di Carlson Group cu nan tabata ‘interesa’ pa cumpra e propiedad. RIU a bati riba porta dia 14 di mei, y 22 di mei, e deal tabata cla.