Polis buscando informacion di feto humano haya band’i Natural Bridge

ORANJESTAD - Polis diaranson merdia a informa cu nan ta buscando informacion pa caso di Feto haya band’i Natural Bridge un siman mas prome. Manera ta conoci, diadomingo dia10 maart 2024 pa 13:05 central di polis a wordo notifica pa un persona cu nan a bin contra cu un Feto (fetus)(. E prome informe cu central di polis a haya ta cu segun e personanan e ta mustra di ta trata un animal morto y e tabata dera den santo pero nan no ta sigur. 

Central di polis a despacha patruya na  un rancho na “Piedra Cora” situa banda di caminda poco prome cu yega Natural Bridge.

Patruya a yega na e sitio menciona y a confirma cu di berdad ta trata di un feto morto lora den paña.  A dirigi e team forensico di polis na e sitio y ta bin constata cu ta trata di un feto humano y no un feto di animal. 

E mesun dia pa 14:30 fiscal a laga tuma e feto pa investigacion. Dia 11 maart 2024 Dr. Texier a haci autopsia riba e feto y a constata cu ta trata di un feto masculino di mas o menos cinco pa seis luna den desaroyo y cu ta trata di un caso cu lo mester a pasa sea un of dos dia prome cu 10 maart 2024.

Si tin cualkier persona cu sa algo di e caso y si tin cualkier persona cu por a mira algo, por yama departamento di Jeugd- en Zedenpolitie (J.Z.P.) na 

281 3180 of por jama tipline di polis na number 11141 si bo persona ta desea di keda anonimo. NOTA: E potret cu ta acompaña e articulo aki ta uno generico y ta solamente pa ilustracion y no necesariamente ta e feto haya segun e relato.