Varios practica dental na Aruba a haya bishita sorpresa di inspectie di Aruba y Hulanda!

ORANJESTAD - Den e prome siman di maart Inspectie Volksgezondheid Aruba (IVA) conhuntamente cu Inspectie Militaire Gezondheidszorg Hulanda (IMG) a bishita 5 practica dental na Aruba. E bishitanan no a wordo anuncia di antemano na e practicanan y tabat un sorpresa. Tambe a reuni cu algun stakeholders importante den e sector dental na Aruba durante e siman aki.

E meta di e proyecto tabata pa determina e prioridadnan den e sector dental segun e riesgonan mas halto. Na e manera aki IVA por determina unda por aloca y concentra su esfuersonan mas eficiente cu ta posibel. Esaki ta den e cuadro pa stimula mehoracion di e calidad di cuido den e sector dental pa e salud y siguridad di pashentnan.

Compara cu e nulmeting cu IVA haci na 2019-2020 (por haya e rapport aki pa lesa ariba nos website www.iva.aw) por a nota un mehoracion den e practicanan dental pero tambe a mira cu algunaspecto a keda igual cu locual IVA a constata na 2019-2020.

E bishitanan y conversacionnan a conduci na puntonan di mehoracion pa no solamente e practicanan dental individual pero tambe pa e sector dental en general manera e necesidad pa stimula e uzo di normanan y standardnan den e sector aki.

E practicanan dental cu a wordo bishita lo ricibi un rapport di IVA cu lo consisti di puntonan di mehoracion. E puntonan di mehoracion na nivel nacional lo wordo presenta na e sector dental pa asina conhuntamente tuma e pasonan necesario pa mitiga e riesgonan.