Segun minister, Secrets Hotel ta buscando mas di 400 trahado pa traha

SAN NICOLAS – E hotel cu tin planea pa habri su portanan fin di aña na San Nicolas, Secrets, ta buscando mas di 400 trahado pa por opera e hotel. Siman pasa e mandatario encarga cu Labor a Glenbert Croes a reuni cu representantenan di ehotel. E mandatario a publica un relato riba e reunion, pero no a anuncia cuanto trahado tabata buscando. Den un reaccion breve diaranson pa Noticiacla, e mandatario a informa cu, saliendo for di punto di bista cu mester di 1.5 trahado pa cada camber, esaki ta yega na un total di posiblemente 450 trahado. Pero e cantidad exacto ainda no tabata conoci y lo a keda di averigua e informacion ey. 

UN HOTEL CU LO TRECE HOPI DESAROYO CU NE PA E PUEBLO DI PARIBA. 

Segun e mandatario den su comunicado, no ta solamente hotel, pero e efectonan secundario economico cu e proyecto turistico aki lo trece pa San Nicolas pa loke ta trata negoshi y comercio, ta brinda un perspectiva nobo pa pariba. 

FERIA LABORAL

Premirando e desaroyonan aki, hunto cu DPL, EPE y Oficina di Gobierno na San Nicolas, e mandatario a informa cu e la reuni cu Secrets pa prepara e feria laboral cu lo tuma luga na San Nicolas mes den cooperacion estrecho cu AHATA y San Nicolas Business Association pa asina duna e pueblo di San Nicolas e prome oportunidad pa registra y aplica pa un trabou na e hotel aki.

BALUARTE HOTELERO

Ademas di e progreso economico cu e hotel aki lo trece, ta conoci cu hopi baluarte hotelero ta di San Nicolas e mandatario a sigui bisa. Ademas segun Croes, hopi di nos hendenan cu ta bibando na San Nicolas tur dia ta baha bay te Noord pa traha den nos hotelnan existente brindando nan miho servicio. Pa esun cu ta desea, awo tin e oportunidad pa traha ‘den porta di bo cas’. Pa esunnan cu ta dificil yega te Noord pa motibo di transporte of pa motibo di yiunan chikito cu ta bay scol, awor tin e oportunidad pa por traha cerca di cas mes.

Ademas di esaki, manera Minister Glenbert Croes a anuncia anteriormente, “nos ta habriendo un Enseñansa pa Empleo na San Nicolas cu lo mester bay brinda e cursonan necesario dirigi riba e mundo hotelero y e industria energetico cu pronto lo ta desaroyando na San Nicolas tambe. Sea bo ta nobo den e mundo di horeca of ta desea di cambia di funcion, EPE t’ey pa brinda bo e oportunidad di (re)capacitacion cu lo amplia bo oportunidad pa por haya un trabou.”