CBS: Prijs di transporte na Aruba a conoce aumento cu mayor efecto

ORANJESTAD - E indice di prijs di consumo (CPI) pa luna di Februari 2024 ta 108.57 segun Oficina Central di Estadistica di Aruba, loke ta representa un subida di 0.2% compara cu e indice di Januari 2024 (108.31).

E cambio di e CPI pa e ultimo diesdos (12) lunanan (Februari 2023 te cu Februari 2024) ta 0.9%, un caida di 6.2 punto di porcentahe (ppt) compara cu e periodo corespondiente di aña pasa (7.1%).

E promedio anual (ultimo 24 luna) di e tasa di inflacion pa e periodonan di Februari 2021 te cu Februari 2022 y Februari 2023 te cu Februari 2024 ta 2.4%, un caida di 3.7 ppt compara cu e 6.1% registra den e periodonan di Februari 2020 te cu Februari 2021 y Februari 2022 te cu Februari 2023.

Durante e luna aki, cinco (5) di e diesdos (12) sectornan a registra subida di prijs. E subidanan cu tawata tin e mayor efecto riba e CPI a wordo registra pa e sectornan di “Transporte” (2.5%), “Paña y sapato” (5.1%) y “Mobilario” (1.2%), causando un efecto di respectivamente, 0.31, 0.11 y 0.11 ppt. E subidanan den e restante sectornan a contribui cu un efecto di 0.03 ppt riba e CPI di Februari 2024.