Canwood: Deal entre ‘Carlson Group y RIU’ ta situacion irreversible

ORANJESTAD – ‘E deal (entre Carlson Group, doño di Radisson Hotel) ta un situacion irreversible’. Asina abogado pa Carlson Group y tur otro grupo cu ta resorta bou di Radisson, Doris Canwood a sigura tur hende y huez den corte awe mainta. E tabata determina pa destrui e defensa di e contra partido. Den un forma determina e la repasa e lista di puntonan menciona pa e defensa, y un pa un, purba desbarata nan.

DESBARATA DEFENSA DI AGF

Rapidamente a cuminsa indica cu ‘tur loke cu AGF’ ta alega, mester wordo declara no admisible, y cu huez mester ‘rechasa’ tur esaki. Ora cu e puntonan ey tabata cla, Canwood a sigui pa e parti fiscal huridico. A cuminsa cu e structura di AGF no ta cuadra y no ta valido. Eynan tambe tabata prome biaha cu e abogado a admiti cu fecha, (22 di mei) cu enberdad tin un deal firma entre Carlson Group y RIU hotels, y cu e ta un ‘situacion irreversible’ y cu huez no por haci mucho cos. “Loke cu AGF por cuminsa, ta un proceso pa daño y perhuicio”. Canwood a sigura huez tambe cu partidonan tabata hopi leeuw di otro. Ademas, e reclamo cu partidonan tabatin exclusividad pa negosha, tampoco no ta valido, pasobra e termino ey (di 45 dia) a vence dia bieu.

STROBA DEAL

Canwood a mustra tambe cu pa papia di cu Carlson Group ta ‘strobando un deal, mester tin un acuerdo’. “Si no tin un acuerdo, con por papia cu a stroba e deal”? Abogado a puntra. Tambe a mustra cu tabatin por lo menos 10 punto di desacuerdo. “E negoshacionnan no tabata bay ningun caminda. Y ainda AGF tabata pidi un descuento den e prijs di compra” Canwood a sigui bisa.

ULTIMO INTENTO

Ora cu a trata e deal cu RIU, -cu a bati riba porta dia 14 di mei-, atrobe Carlson Group (segun abogado Canwood) a haci un ultimo intento atrobe cu AGF pa wak kico ta haciendo. Dia 21 di mei a manda e lista di 10 puntonan di desacuerdo ainda, pero nada no a pasa, segun Canwood.

LEY DI DELAWARE

A sigui riba e parti legal, argumentando cu segun e abogado, mester actua segun e ley di (estado mericano (Delaware). E compania ta uno registra eynan, y demas negoshacion a tuma lugar tambe via Delaware. Como tal e leynan mericano ta aplica den e caso aki, y no esun di Aruba. Algo cu den e di dos tanda, abogado di AGF a purba desmenti, bisando cu tur cos tabata Rubiano.: E compania ta uno Rubiano, e hotel ta na Aruba, tur e nv’nan di Aruba ta registra na Aruba etc etc…

MIDI CU DOS MIDI

Gobierno di Aruba ta midi cu dos midi, Canwood a sigui alega. Aki ta referi na e deal cu Bahia Principe pa un all inclusive na San Nicolas, siendo cu na Palm Beach no por. E embergadura di un all inclusive ta keda mescos, segun Canwood. Pues gobierno ta midiendo cu dos midi. Ademas, e ‘maneho cu tin’, ta un maneho pero no un ley. De hecho, e maneho no por stroba un benta entre dos compania tuma lugar. “Ora cu caba cu e benta, gobierno tin cu atende cu e cumprado. No prome”. Ademas, no por sin mas aplica e cambio aki. “Mester cambi’e pa medio di un ley”, Canwood a bisa, refiriendo na e maneho publica di 2013.

PREGUNTA DI HUEZ

Huez na su turno, a cuestiona e actitud di Carlson Group pa cu e benta y forma di proceder. “Pakico boso no a bisa AGF cu boso tabatin un acuerdo (cu RIU)?”. Riba esey e abogado a bisa cu e no sa, pasobra e no tabata e abogado cu a negosha esaki. Huez a sigui puntra, ‘Pakico boso no a avisa (AGF) cu boso tabatin un tercer partido. Boso por a bisa ‘hey, tin un partner cu su rosea cayente ta riba mi lomba. Wak pa boso resolve e diferencianan lihe pa por keda cla”. Riba esaki abogado Canwood a mustra cu asina e abogadonan mericano nan estilo ta y cu nan tin custumber di opera cu e tactica ey.

VEREDICTO

Huez a sera e caso y a sigura cu lo dicta sentencia dia 17 di juni proximo pa 8:30 di mainta.