Delta a lanta buelo, bati alarma y bolbe Aruba pa problema di motor

ORANJESTAD – Un avion di aeroliña Delta Airlines, buelo 581 cu a lanta buelo diamars 19 minuut pasa di 4 for di aeropuerto di Aruba, a haya problema cu su motor y a dicidi di bolbe Aruba. Aeropuerto a confirma cu e capitan a bati alarma grandi cu a pone cu aeropuerto a active su plan di emergencia grandi y a cera aeropuerto como precaucion. Tabata 13 minuut despues, ora cu e avion a bolbe Aruba y aterisa sin problema, aeropuerto a anuncia cu a cancela tur emergencia y cu e avion a aterisa safe y cu tur pasahero a wordo baha y tabata wordo atendi pa e aeroliña. E avion, mientrastanto a keda tera pa pasa un inspeccion completo door di autoridad y tambe di e aeroliña.