CTO: Aruba ta entre 11 destinacion turistico di Caribe cu a supera 2019

MIAMI – E yegada di biahero internacional pa e region di Caribe a aumenta cu 14.3% den 2023. Asina e organisacion di turismo di Caribe (CTO) ta informa. Asina e tendencia di recuperacion positivo ta continua. E secretaria general Dona Regis-Prosper, ta atribui e resultado y e demanda sosteni di biahenan desde Merca, e mercado principal di Caribe, y e miho infrastructura relaciona cu e destinacion di turismo. E ta splica cu e aumento tambe ta debi na e iniciativa strategico di e mercado y e aumento di capacidad di e transporte aereo entre e region y e mercadonan specifico.

BISHITA TURISTICO

E bishita turistico tabata aproximadamente 32.2 miyon, cu ta 4 miyon mas di 2022. Ademas Caribe a supera e yegada di prome cu e pandemia cu un modesto 0.8%. 

DESTINACIONAN MIHO

E 11 destinacionan cu moderadamente a supera e cifra di referencia di 2019 ta República Dominicana, Anguila, Aruba, Corsou, , Granada, Guyana, Jamaica, Puerto Rico, St Maarten, Turks & Caicos y US Virgin Islands. Ta indica cu 16.3 miyon tabata procedente di Merca na 2023, cu ta representa un aumento annual di 12.7%. Den e sentido ey, e mercado Canades a resulta den 3 miyon di bishitante, cu ta un aumento di 46.1% den comparacion cu 2022.   Turistanan di Europa a keda mescos cu 5.2 miyon mientras cu esnan di Sur America a aumenta cu 14%, pa un total di 1.7 miyon di biahero.