Aruba Growth Fund y Radisson hotel a topa den corte

ORANJESTAD – Aruba Growth Fund kier hues para e benta di Radisson Hotel cu RIU hotels, y pone AGS y Carlson sinta bek na mesa pa caba nan negoshacion y concretisa e deal di compra. Esey ta e unico cos cu AGF kier. “Nos no kier nada mas. Nos ta hendenan arubiano, cu ta cumprando un hotel arubiano” Rene Kan, un di e socionan director di AGF a bisa NoticiaCla.com na final di e caso sumario cu nan a entama contra grupo Carlson. Y Carlson Group (Radisson Hotel) kier pa huez declara tur peticion di AGS y otro partidonan inadmisible. 

INFORMACION INTERESANTE

Den corte, manera a anticipa, hopi informacion interesante a keda presenta dilanti, pa ambos partido. Entre nan, cu Carlson Group ta confirma den corte pa medio di su abogado Doris Canwood, cu ya for di 22 di mei ultimo, Carlson Group tin un deal cu RIU pa compra di Radisson Hotel. Y tambe cu e deal aki a tuma ‘apenas’ 8 dia, compara cu e 8 luna cu AGF ta negoshando pa e compra di e mesun propiedad.

ABOGADO

Ademas a sali na cla cu e abogado cu AGF a solicita pa haci e trabou di ‘due dilligence’ pa nan, di e propiedad, ta e mesun abogado cu a sera e deal pa RIU despues. Segun abogado di AGF, RIU posiblemente a usa informacion adkeri di e ‘due dilligence’ pa por yuda sera e deal pa RIU mes.

DEAL BREAKER

AGF su abogado mr vd Heuvel, a sigura cu nan tabata ‘bou di e impresion’ cu tabatin un deal preliminar for di dia 11 di mei, y cu mester a ‘solamente’ keda cla cu ‘algun otro asunto pendiente’, pero cu sigur no tabata un ‘deal breaker’. Abogado pa Carlson Group a sigura huez cu e negoshacion tabata ‘tarda’ sin ningun avance. A tarda 8 luna y ainda no por a keda cla pa resolve e lista di ‘puntonan mayor di preocupacion’. AGF a desmenti esaki.

CARLSON GROUP

Carlson Group a sigura huez cu, si AGF kier bringa, esaki no ta e forma, sino mas bien tin cu busca su derecho pa posibel ‘daño y perhuicio’ den un otro corte. No asina. AGF ta sinti cu nan a ‘wordo tene na liña’ deliberadamente pa Carlson Group, dunando e ultimo aki tur tempo pa ‘sera su deal’ cu RIU. Algo cu nan a logra tambe segun abogado di Carlson Group. Henter e asunto aki a laga un sabor amargo atras pa AGF, cu ta sinti cu loke cu Carlson Group a haci, ta ‘inaceptabel’. Abogado pa Carlson Group mientrastanto a pidi hues pa declara e peticion di tur partido opuesto, como ‘no admisibel’.

REACCION HUEZ

Huez a cuestiona e actitud di Carlson Group pa cu e benta cu RIU y mas ainda, nan falta di informa AGF di e deal ey.”Pakico boso no a gewoon bisa e partido ey cu boso tin un acuerdo cu e cumprado nobo (RIU)?”. Tambe e huez a bisa, cu Carlson Group mester a bisa AGF algo den e direcion di ‘shonnan boso pura, resolve e puntonan di diferencia, pasobra mi tin rosea di un cumprado den mi lomba”. Segun abogado Canwood, e no tabata parti di e negoshacion y como tal no por bisa. Pero si, cu esey ta e forma con abogadonan di Merca ta prosegui y cu e ta un sistema di deal internacionalmente. AGF a desaproba e methodo ey y a pidi pa simplemente stop e benta, y tambe pone nan bek a mesa.

NoticiaCla.com lo tin un raportahe mas amplio riba e caso aki mas laat.