A.T.A. cu otro encuesta pa midi sentimento encuanto Turismo na Aruba

ORANJESTAD - Den un esfuerso pa reforsa desaroyo turistico sostenibel di e isla, A.T.A. a lansa un encuesta cu ta enfoca riba e sentimento local encuanto turismo na Aruba. Esaki ta bira e di tres encuesta similar cu A.T.A. ta lansa, e prome encuesta a tuma lugar na aña 2018 prome cu e pandemia, y un biaha mas na aña 2022 cu ta despues di e pandemia. E informacion y resultadonan ta sirbi como un base pa forma e strategia di A.T.A., y por fungi como un conseho na diferente socionan. Pa actualisa e estudio aki, A.T.A. ta realisa e siguiente ‘Local Sentiment Survey’ pa midi e sentimento local den 2024.

A.T.A. ta reconoce cu e necesidad pa enfoca riba un desaroyo turistico duradero y sostenibel ta di suma importancia como un esfuerzo comun. Uniendo forsa, nos por garantisa cu nos pilar economico principal ta keda un fuente di entrada vital pa e añanan benidero.  E vision di A.T.A. ta basa riba e modelo di ‘High Value – Low Impact’ cu ta para pa un balanse entre cuater pilar cu ta e ‘Calidad di Bida di e residente’, ‘Calidad di Experiencia di e Bishitante’, Proteccion y Conservacion di Medio Ambiente’, y Contribucion Economico di e Sector Turistico’.

E encuesta di ‘Local Sentiment Survey’ ta busca pa reuni opinionan valioso di e comunidad pa mira con pa mehora y reforsa e industria turísticoFor di calidad di servicio, conservacion di medio ambiente, con pa eleva e producto turístico, y lo midi e calidad di bida di e comunidad local. Banda di esaki, lo percura pa acerca schoolnan secundario, negoshinan local, trahadornan den e industria turistico, y mas.

E prome salida di encuesta a tuma lugar na un manera organico na comienso di maart durante e festival di ‘Un Canto di Himno y Bandera’, caminda cu A.T.A. a presenta cu un booth pa cu colección di data. Por menciona cu a ricibi bon acogida di comunidad cu tabata mas cu dispuesto pa yena e encuesta. Algun persona a tuma e oportunidad pa comparti nan sentimentonan y ideanan adicional relaciona cu e encuesta of topico general cu e ekipo di A.T.A. 

Actualmente, e encuesta di disponibel ‘online’ riba pagina di Facebook y Instagram ‘Oficina di Turismo’ y personalmente durante diferente actividad den fin di siman grandi di Himno y Bandera.

Online: https://bit.ly/4aaajZY . Alabes, e link aki ta disponibel riba pagina di Facebook y Instagram di ‘Oficina di Turismo’. 

17 di maart 2024: un ekipo di encuestado di A.T.A. lo ta presente cu un booth durante Manifestacion Cultural entre 7or te cu 10or di anochi riba Plaza Betico Croes. Durante e evento aki, tur persona cu participa na e encuesta lo ricibi un potret y lo bai experiencia Aruba di antes te cu awo.

18 di maart 2024: A.T.A. lo ta presente parti mainta/ merdia na Centro di Bario Brazil, Museum of Industry San Nicolaas, Centro di Bario Savaneta, y Museo Argeologico Oranjestad. 

Por comunica cu nos via email m.kelly@aruba.com pa informacion of comentario adicional. Ta di menciona cu A.T.A. lo comparti resumen di e resultado cu e comunidad di Aruba ,y riba website di A.T.A. cu lo wordo lansa pronto. A.T.A. ta invita e comunidad local pa yena e encuesta y pa laga nan voz resona. Di awo caba, nos ta desea e comunidad di Aruba un Feliz Dia di Himno y Bandera!